مختار انصاری کی اہلیہ نے سپریم کورٹ سے رجوع کیا

بہوجن سماج پارٹی کے دبنگ رکنِ اسمبلی مختار انصاری کی اہلیہ افشاں انصاری نے شوہر کی جان کے تحفظ کے لئے سپریم کورٹ سے رجوع کیا ہے۔

افشاں انصاری نے اپنی عرضی میں سرکاری افسروں کو یہ یقینی بنانے کے لئے ہدایت دینے کا مطالبہ کیا ہے کہ ان کے شوہر کی جان محفوظ رہے اور اترپردیش کے تمام معاملات کی سماعت کے دوران آئین کی دفعہ 21 کے تحت ان کے حقوق کو تحفظ فراہم کیا جائے ۔

واضح ر ہے 26 مارچ کو سپریم کورٹ نے مختار انصاری کو پنجاب جیل سے اترپردیش جیل لے جانے کی ہدایت دی تھی ۔ مبینہ طور پر وہ ایک جبراََ وصولی معاملے میں جنوری 2019 سے پنجاب کی جیل میں بند تھے ۔ عرضی گزار کا کہنا ہے کہ اترپردیش میں ذاتی طور پر مقدمے کی سماعت میں شریک ہونے کے دوران ان کے شوہر کی جان کو مستقل خطرے کا خدشہ ہے ، اسے میں سب سے ضروری یہ ہے کہ جب مختار انصاری کو ایک جیل سے دوسری جیل منتقل کیا جائے یا اترپردیش کی عدالت میں پیش کیا جائے تواس وقت قانونی کارروائی ہونی چاہئے۔ عرضی میں کہا گیا کہ سینٹرل ریزرو پولیس فورس (سی آر پی ایف) اور بارڈر سکیورٹی فورس (بی ایس ایف) جیسی سکیورٹی فورسز کی موجودگی میں ویڈیو گرافی کی جانی چاہئے۔