’اللہ کی حفاظت میں ہوں‘ کہہ کر کورونا ویکسین کی مخالفت کرنے والے رکن پارلیمنٹ شفیق الرحمن برق نے لگوائی ویکسین

ہندوستان میں کورونا انفیکشن کی دوسری لہر کے درمیان ٹیکہ کاری مہم زور و شور سے جاری ہے۔ اس درمیان سماجوادی پارٹی رکن پارلیمنٹ ڈاکٹر شفیق الرحمن برق نے بھی ویکسین لگوا لی ہے۔ حالانکہ انھوں نے دو تین مہینے قبل ویکسین کی مخالفت کی تھی لیکن اب کووی شیلڈ کی پہلی خوراک لے لی جس سے امید ہے کہ ان کے حامیوں میں ایک مثبت پیغام جائے گا۔

دراصل کئی سیاستدانوں نے پہلے تو کورونا ویکسین کے خلاف بیانات دیے، اور پھر جب کورونا انفیکشن کی رفتار کم ہونے کی جگہ بڑھنے لگی اور طبی ماہرین و سائنسدانوں نے ٹیکہ کے خلاف پھیلی غلط فہمیوں کو دور کرنے والے بیانات دیے اور انفیکشن سے بچنے کے لیے اسے ضروری قرار دیا تو کئی سیاستدانوں نے آگے آ کر ٹیکہ لیا۔ شفیق الرحمن برق بھی ان سیاستدانوں میں شامل ہیں جنھوں نے پہلے تو ٹیکہ لینے سے انکار کر دیا، لیکن 25 جون کو انھوں نے بالآخر پہلی خوراک لے ہی لی۔

واضح رہے کہ اپریل ماہ میں شفیق الرحمن برق کا ایک بیان کورونا ویکسین کی مخالفت میں سامنے آیا تھا جس میں انھوں نے کہا تھا کہ ’’میں بغیر ویکسین کے ہی اللہ کی حفاظت میں ہوں اور مجھے ویکسین کی ضرورت نہیں ہے۔ میری زندگی اور موت اللہ کے ہاتھ میں ہے، مجھے ابھی ویکسین لگوانے کی کوئی ضرورت نہیں ہے، میری عمر 90 سال ہے اور مجھے پختہ یقین ہے کہ مجھ پر کوئی اثر نہیں ہوگا۔‘‘