مدھیہ پردیش: بی جے پی کے نئے صدر نے کی میڈیا کو پیسے کھلانے کی بات

بھارتیہ جنتا پارٹی (بی جے پی) کی مدھیہ پردیش یونٹ کے نو منتخب صدر راکیش سنگھ نے میڈیا پر سخت تبصرہ کر کے صوبے کی سیاست میں ہلچل پیدا کر دی ہے۔ سوشل میڈیا سائٹوں پر وائرل ایک ویڈیو میں راکیش سنگھ یہ کہتے ہوئے نظر آ رہے ہیں کہ ’’کوریج تو ہمیں تب ملے گا جب میڈیا کو کچھ (انگلیوں سے پیسے کا اشارہ کرتے ہوئے) ملے گا۔ ‘‘ تنازعہ کے طول پکڑنے کے بعد بی جے پی جہاں صفائی پیش کر رہی ہے، وہیں کانگریس نے راکیش سنگھ پر میڈیا سے معافی مانگنے کا دباؤ بنانا شروع کر دیا ہے۔

کانگریس کے رہنما اور اسمبلی میں حزب اختلاف کے لیڈر اجے سنگھ نے راکیش سنگھ کی طرف سے میڈیا پر پیسے لے کر کوریج کرنے کا الزام لگائے جانے کی مذمت کرتے ہوئے کہا کہ راکیش سنگھ کو فوری میڈیا سے معافی مانگنی چاہئے۔ اجے سنگھ نے کہا کہ ’’بی جے پی ہمیشہ جمہوریت کے تمام ستونوں کو نظرانداز کرتی ہے۔ خواہ عدلیہ ہو، انتظایہ ہو، مقننہ ہو یا پھر جمہوریت کا چوتھا ستون میڈیا ہو۔ وہ سب کو ہمیشہ اپنے قابو میں رکھنے کی کوشش کرتی ہے۔

اپوزیشن کے رہنما نے کہا کہ یہی وجہ ہے کہ راکیش سنگھ نے سچ بولا ہے، کیونکہ بی جے پی کا اصل چہرہ یہی ہے۔ انہوں نے الزام عائد کیا کہ گزشتہ 15 سالوں میں اس حکومت نے میڈیا کو کنٹرول کرنے اور اسے لالچ میں پھسلانے کی ممکن کوشش کی ہے۔ اس کے باوجود بھی حکومت کی خامیاں سامنے آرہی ہیں، گھوٹالے اور کارنامے منظر عام پر ہیں، جب جب میڈیا نے غیر جانبداری کے ساتھ کوریج کی ہے۔ انہوں نے کہا کہ بی جے پی کے صدر نے جو الزامات عائد کئے ہیں وہ پوری میڈیا کی بے عزتی ہے اس کے لئے انہیں فوری طور پر معافی مانگنی چاہئے۔

وہیں بی جے پی کے ایک رہنما نے اس معاملہ پر کہا کہ پریس کانفرنس کے بعد ہوئے ایک مذاق کو کانگریس مدہ بنانے کی کوشش کر رہی ہے۔

مدھیہ پردیش میں اس سال انتخابات ہونے جا رہے ہیں اور پیسوں کا لین دین ہوگا اس بات سے بھی انکار نہیں کیا جا سکتا ۔ لیکن صوبے میں بر سر اقتدار جماعت کے ایک ذمہ دار عہدے پر فائز رہنما کی طرف سے میڈی کے تئیں کیا گیا یہ تبصرہ کافی سنجیدہ ہے۔

واضح رہے کہ جبل پور سے رکن پارلیمنٹ راکیش سنگھ اسی ہفتہ بی جے پی کی مدھیہ پردیش اکاجئی کے صدر منتخب مقرر ہوئے ہیں۔ آئندہ انتخابات کے پیش نظر نند کمار سنگھ چوہان کے مقام پر انہیں ریاستی صدر مقرر کیا گیا ہے۔