دہلی-این سی آر میں صبح کے وقت بارش، کئی علاقے زیر آب، کئی مقامات پر ٹریفک جام

نئی دہلی: دہلی کے کئی علاقوں میں بارش کی وجہ سے لوگوں کو پانی بھرنے اور ٹریفک جام کے مسئلہ کا سامنا کرنا پڑا۔ دفتری اوقات کی وجہ سے لوگوں کو کافی پریشانی ہوئی۔ بارش کے درمیان لوگ صبح دفاتر کے لیے روانہ ہوئے لیکن کئی مقامات پر پانی جمع ہونے کی وجہ سے گاڑیوں کی رفتار ماند پڑ گئی اور انہیں تاخیر ہوئی۔

رپورٹ کے مطابق نجف گڑھ روڈ، بارہ پلا علاقے میں سڑکیں زیر آب نظر آئیں۔ بارش کے بعد نوئیڈا کی سڑکوں پر گاڑیوں کا طویل جام لگ گیا۔ کئی علاقوں میں سڑکوں پر گاڑیاں رینگتی نظر آئیں۔ تاہم، بارش کے ساتھ ہی دہلی میں ٹریفک جام ایک عام مسئلہ ہے اور منٹوں کا سفر گھنٹوں میں طے ہوتا ہے۔

خیال رہے کہ دہلی اور اس کے آس پاس کے علاقوں میں مانسون کی بارش جاری ہے۔ جمعرات کو بارش کے بعد آج جمعہ 6 اگست کو بھی صبح کا آغاز بارش کے ساتھ ہوا۔ محکمہ موسمیات نے دن بھر ایسے ہی موسم کی پیش گوئی کی ہے۔ آئی ایم ڈی کی پیش گوئی کے مطابق دہلی اور آس پاس کے علاقوں میں مسلسل تین دن یعنی اتوار تک بارش ہونے کا امکان ہے۔

وسطی دہلی میں جمعرات کی شام شدید بارش ہوئی، جس کی وجہ سے زیادہ سے زیادہ درجہ حرارت 33.6 ڈگری سیلسیس ریکارڈ کیا گیا، جو سیزن کے اوسط سے ایک ڈگری کم ہے۔ کم از کم درجہ حرارت 23.3 ڈگری سیلسیس تھا، جو موسم کے اوسط سے 2.3 ڈگری کم ہے۔ آئی ایم ڈی نے جمعہ کو مطلع عام طور پر ابر آلود رہنے اور درمیانی بارش کی پیش گوئی کی ہے۔ اس کے ساتھ ساتھ زیادہ سے زیادہ اور کم سے کم درجہ حرارت 33 اور 24 ڈگری سینٹی گریڈ رہنے کا امکان ہے۔