اڈیشہ کے بالاسور میں 3 ٹرینیں پٹری سے اتر یں، حادثے میں 207 لوگوں کی موت

اڈیشہ کے بالاسور میں جمعہ یعنی 2 جون کی شام کو ایک بڑا ٹرین حادثہ پیش آیا۔ کورومنڈیل ایکسپریس کی بوگیاں پٹری سے اتر گئیں۔ یہ واقعہ بہاناگا بازار اسٹیشن پر شام تقریباً 7.20 بجے اس وقت پیش آیا جب کورومنڈیل ایکسپریس کولکتہ کے قریب شالیمار اسٹیشن سے چنئی سینٹرل جارہی تھی۔ ریسکیو ٹیم امدادی کاموں میں مصروف ہے۔

نیوز پورٹل ’اے بی پی ‘ پر شائع خبر کے مطابق ریلوے کے ایک اہلکار نے بتایا کہ ہاوڑہ جانے والی 12864 بنگلورو-ہاوڑہ سپر فاسٹ ایکسپریس کی کئی بوگیاں بہاناگا بازار میں پٹری سے اتر گئیں اور دوسرے پٹری پر  جا گریں ۔ انہوں نے بتایا کہ ، "یہ ڈبے پٹری سے اترنے والی 12841 شالیمار-چنئی کورومنڈیل ایکسپریس سے ٹکرا گئے اور اس کی بوگیاں بھی الٹ گئیں۔" اہلکار نے بتایا کہ کورومنڈیل ایکسپریس کی بوگیاں پٹڑی سے اترنے کے بعد ایک مال ٹرین سے ٹکرا گئیں، جس سے مال ٹرین کو بھی نقصان ہوا۔‘‘

اڈیشہ کے چیف سکریٹری پردیپ جینا نے کہا کہ اس ٹرین حادثے میں 207 سے زیادہ لوگوں کی موت ہوئی ہے۔ اس کے ساتھ ہی 900 سے زائد افراد زخمی ہوئے ہیں۔ جینا نے بتایا کہ زخمی مسافروں کو گوپال پور سی ایچ سی منتقل کیا گیا ہے۔ شدید زخمی مسافروں کو مناسب دیکھ بھال اور علاج کے لیے ریفر کیا جا رہا ہے ۔ ان کا مزید کہنا تھا کہ زخمیوں کی تعداد زیادہ ہونے کی وجہ سے ایمبولینسز کے ساتھ بسیں بھی لائی گئی ہیں۔ واضح رہے اڈیشہ کے وزیر اعلی  نوین پٹنائک نے کہا کہ وہ صورتحال کا جائزہ لے رہے ہیں اور ہفتہ  یعنی آج 3 جون کی صبح موقع پر جائیں گے۔

ہندوستانی ریلوے نے کہا کہ مدد کے لیے، 91 6782 262 286، 8972073925، 9332392339، 8249591559، 7978418322 اور 9903370746 ٹیلیفون نمبر  جاری کیے ہیں۔ ریلوے نے کہا کہ کسی بھی ایمرجنسی کی صورت میں آپ ان  پر رابطہ کر سکتے ہیں۔ اس ٹرین حادثے کی وجہ سے کئی ٹرینوں کو منسوخ یا موڑ دیا گیا ہے، جن میں ستناگچی چنئی سنٹرل ایکسپریس (22807)، دیگھا سے وشاکھاپٹنم (22873) شامل ہیں۔

مرکزی وزیر ریلوے اشونی ویشنو نے اڈیشہ ٹرین حادثے کے لیے معاوضے کا اعلان کیا ہے۔ انہوں نے کہا کہ حادثے میں جاں بحق ہونے والوں کے لواحقین کے لیے 10 لاکھ روپے اور شدید زخمیوں کے لیے 2 لاکھ روپے کے معاوضے کا اعلان کیا گیا ہے۔ ساتھ ہی انہوں نے بتایا کہ معمولی زخمی ہونے والے کو 50 ہزار روپے دیے جائیں گے۔