یوپی: سرکاری گؤشالا میں سینکڑوں گایوں کی موت!

اتر پردیش کے وزیر اعلیٰ یوگی آدتیہ ناتھ کے آبائی شہر گورکھپور سے ملحقہ مہارج گنج میں ایک سرکاری گؤشالا میں کم از کم 100 گایوں کی پر اسرار اموات کا انکشاف ہوا ہے۔ گایوں کی موت کی خبر کو چھپانے کے ارادے سے رات کے وقت اندھیرے میں آناً فاناً میں جے سی بی مشینیں لگاکر مدد سے لاشوں کو دفن کیا جا رہا ہے۔ اس معاملہ میں نہ تو گؤشالا کے منیجر اور نہ ہی کسی افسر کے پاس کوئی جواب ہے۔ گایوں کی موت کی وجہ بھی صاف صاف نہیں بتائی جا رہی۔ اس خبر کو ایک نیوز ویب سائٹ نے شائع کیا ہے۔

مہاراج گنج ضلع کی نچلول تحصیل واقع مدھولیا گؤ سدن میں ہوئی 100 سے زائد گایوں کی موت ہو چکی ہے اور تقریباً اتنی ہی گائیں بیمار ہیں اور شدید سردی کے موسم میں بھی کھلے آسمان کے نیچے بغیر چارے نیم جان حالت میں پڑی ہوئی ہیں لیکن افسران پر کوئی اثر نظر نہیں آ رہا۔ اطلاعات کے مطابق ابھی تک کوئی بڑا افسر موقع پر نہیں پہنچا جبکہ تحصیل سطح کے ملزمان اس معاملہ میں لیپا پوتی کرنے میں مصروف ہیں۔ تحصیل ملازمین نے تقریباً آدھا درجن جے سی بی مشینوں کی مدد سے رات میں ہی جنگی پیمانے پر گایوں کو دفن کرنے کا کام انجام دیا۔

ویب سائٹ پر ایک ویڈیوں بھی پوسٹ کیا گیا ہے جس میں صاف دیکھا جا سکتا ہےکہ جے سی بی مشینوں سے کس طرح گایوں کو دفن کرنے کا کام کیا جا رہا ہے۔ ایک جے سی بی کے ڈرائیور کے مطابق اس نے اکیلے ہی کم سے کم 60 گایوں کی لاشوں کو دفن کیا ہے جبکہ دیگر جے سی بھی مشینوں بھی کام میں لگی ہوئی ہیں۔ علاقے کے باشندگان مرنے والی گایوں کی تعداد کو بہت شیادہ بتا رہے ہیں ۔ ویب سائٹ پر شائع ہوئیں تصویروں میں دیکھا جا سکتا ہے کہ پوری گؤشالا میں گایوں کی لاشیں بکھری پڑی ہیں۔

مندرجہ ذیل ویڈیوں میں دیکھیں کہ کس طرح رات کے اندھیرے میں فوت گایوں کی لاشوں کو جے سی بی سے کھودے گئے گہرے گڈھے میں پھینکا جا رہا ہے۔

(یہ ویڈیو ڈائنامائٹ نیوز سے شکریہ کے ساتھ لیا گیا ہے)

خبروں کے مطابق یہ گؤشالا وزیر اعلیٰ یوگی آدتیہ ناتھ کاڈریم پروجیکت ہے جو کہ تقریباً 400 ایکڑ میں پھیلی ہوئی ہے۔ اتر پردیش میں یوگی حکومت کے برسر اقتدار آنے کے بعد یہاں کی انتظامیہ کو تبدیل کیا گیا ہے۔ معلومات کے مطابق کچھ مہینے پہلے تک یہاں تقریباً 350 گائیں تھیں اور حال ہی میں تقریباً 150 مزید گایوں کو گورکھپور سے لاکر یہاں رکھا گیا ہے۔ زیادہ تر گائیں بیمار ہیں اور بوڑھی گائیں بھی ہیں۔ لیکن گؤشالا کی صلاحیت محض 250 گایوں کی ہے ، ایسے حالات میں گایوں کو اس شدید سردی کے موسم میں کھلے آسمان کے نیچے چھوڑ دیا گیا۔

اطلاع ہے کہ گایوں کی موت کی خبر پاکر سنیچر شام نچلول تحصیل کے ایس ڈی ایم دیویش گپتا نے گؤشالا کا دورہ کیا تھا۔ وہ یہاں صرف ایک گائے کی موت کی بات کرتے ہیں اور گزشتہ ہفتہ کے دوران ہوئیں سینکڑوں گایوں کی اموات پر خاموش ہیں۔ جے سی بی ڈرائیور کے بیان پر ان کا کہنا ہے کہ وہ تفتیش کرا رہے ہیں اور جانچ ہونے کے بعد مجرمان کے خلاف کارروائی ہوگی۔

مندرجہ ذیل ویڈیو میں دیکھیں کہ کس طرح ایس ڈی ایم دیویش گپت معاملہ کو معمولی بتانے کی کوشش کر رہے ہیں۔ ان کا کہنا ہے کہ جے سی بی سے گڈھے پیشگی میں کھدوائے جاتے ہیں تاکہ مستقبل میں کسی گائے کی موت ہو جائے تو اسے دفن کرنے کیلئے انتظام موجود رہے۔

(ویڈیو بشکریہ ڈائنامائٹ نیوز)

گؤشالا کے منیجر جتندر پال سنگھ کا کہنا ہے کہ اس گؤشالا میں صرف 250 گائیں رکھنے کا انتظام ہے، لیکن بہت زیادہ تعداد میں یہاں گائیں آ گئیں اس لئے بدانتظامی پھیل گئی۔ انہوں نے کہا کہ وہ اعلیٰ افسران کو اس حوالے سے مطلع کر چکے ہیں۔

(ویڈیو بشکریہ ڈائنامائٹ نیوز)

یہ خبر سب سے پہلے ڈائنامائٹ نیوز پر شائع ہوئی