موراری باپو نے مودی حکومت کو 100 میں سے 30 نمبر دئے

نئی دہلی: مذہبی کتھا سنانے والے معروف موراری باپو نے مودی حکومت کا رپورٹ کارڈ جاری کیا ہے۔ ’ اے بی پی‘ نیوز کو دئے گئے انٹرویو میں انہوں نے مودی حکومت کا ریزلٹ  بتاتے ہوئے کہا کہ وہ موجودہ حکومت کو 100 میں سے 30 نمبر دیتے ہیں۔ اس کے ساتھ انہوں نے راج دھرم اور آئین سے متعلق سوالات کے بھی جواب دئے۔

موراری باپو اس وقت خصوصی ٹرین سے رام کتھا یاترا کے لیے روانہ ہوئے ہیں۔ 18 دنوں کے اس سفر میں وہ ملک کے 12 جیوترلنگوں پر رام کتھا سنائیں گے۔ ان کے ساتھ اس خصوصی ٹرین میں 1008 عقیدت مند بھی سفر کر رہے ہیں۔ اس ٹرین میں انہوں نے اے بی پی نیوز سے خصوصی بات چیت کی۔

انٹرویو کے دوران موراری باپو سے مودی حکومت کے رپورٹ کارڈ پر ایک سوال پوچھا گیا، جس کے جواب میں انہوں نے کہا ’’پہلے میں ایک استاد تھا۔ پاس ہونے کے لئے  100 میں سے 35 مارکس درکار ہوتے تھے۔ جو امتحان میں 30 نمبر حاصل کرتا تھا اس کو  5 نمبر بڑھا کر پاس کر دیا جاتا  تھا۔‘‘ موجودہ حکومت پر انہوں نے کہا کہ انہوں نے جو اسسمنٹ کیا ہے اس میں موجودہ حکومت کو  30 نمبر دیتا ہوں۔ اوپر والے نے اپنے کرم سے 5 نمبر دے دئے تو پاس ہو جائیں گے۔

راج دھرم کے سوال پر موراری باپو نے کہا ’’راج دھرم کا ذکر رام چرت مانس میں کیا گیا ہے۔ سیاست اور راج دھرم الگ ہیں۔ سیاست میں سام (سمجھوتہ) دام (قیمت) دنڈ (سزا) بھید (اختلافات) آتے  ہیں۔ ان میں سے کوئی بھی راج دھرم میں نہیں آتا۔ راج دھرم وہ ہے جس میں پہلے سادھو  کی رائے لی جاتی ہے، پھر عوام کی رائے لی جاتی ہے۔

گیانواپی تنازعہ پر انہوں نے کہا کہ یہ معاملہ سپریم کورٹ کے ہاتھ میں ہے اور وہی اس کا فیصلہ کرے گا۔ تاہم انہوں نے کہا کہ مسئلہ کا حل عدالت سے رجوع کرنے کے بجائے آپسی مفاہفت سے نکالا جانا چاہئے لیکن 70 سال سے ایسا نہیں ہو رہا، اس لئے لوگوں کو عدالت سے رجوع کرنا پڑا۔