بی جے پی اصل مسائل سے توجہ ہٹانے کے لیے تشدد بھڑکاتی ہے: تیجسوی

پٹنہ: بہار اسمبلی میں اپوزیشن کے لیڈر تیجسوی یادونے ریاست کے کئی اضلاع میں ہوئے تشدد کے لئے بھارتیہ جنتاپارٹی (بی جےپی ) کو ذمہ دار قراردیا اورکہا کہ روزگار سمیت دیگر اصل مسائل سے توجہ ہٹانے کے لئے ایسا کیا جارہا ہے۔

تیجسوی یادو نے آج یکے بعد دیگرے کئی ٹویٹ بھی کیے اور بی جے پی کو نشانہ بناتے ہوئے کہا کہ ’’ہم نوجوانوں کو ملازمت اور بے روزگاروں کوروزگار دینے کی بات کرتے ہیں تو بی جے پی توجہ ہٹانے کے لئے تشدد بھڑکاتی ہے ۔‘‘ انھوں نے کہا کہ وزیر اعظم نریندر مودی کو بتانا چاہئے کہ انھوں نے بی جے پی کے منشور میں کئے گئے کتنے وعدے ابھی تک پورے کئے ہیں۔ وزیراعظم بتائیں کہ آخر انھوں نے نوجوانوں کو دھوکہ کیوں دیا۔

ایک دیگر ٹویٹ میں مسٹر یادو نے کہا کہ ’’میری بہار کے سبھی دلت، مہادلت، پسماندہ اور انتہائی پسماندہ طبقات کے بھائیوں سے گزارش ہے کہ وہ جاگیرداروں کا مہرہ بننے سے بچیں۔ وہ سبھی پسماندہ ہندؤوں کو لڑا کر اقتدار پر قبضہ کر کے منووادی اور برہمن وادی نظام کو پوری جارحیت کے ساتھ نافذ کرنا چاہتے ہیں۔ ان کے ناپاک عزائم سے محتاط رہنا ہوگا۔ سبھی کو مل کر پرامن طریقہ سے رہنا ہے کیونکہ ذات پات اور نسل پرست سنگھی ہمیں تقسیم کرکے حکومت کرنا چاہتے ہیں۔ یہ ہمارے حقوق پر بات نہیں کرنا چاہتے بلکہ ہمیں دوسرے معاملات میں الجھائے رکھنا چاہتے ہیں ۔‘‘

بہار کے مختلف اضلاع میں پیدا تشدد کے لیے انھوں نے آر ایس ایس سربراہ موہن بھاگوت کو بھی تنقید کا نشانہ بنایا۔ انھوں نے کہا کہ ”موہن بھاگوت حال ہی میں 14 دن کے لیے بہار آئے تھے۔ ان 14 دنوں میں انھوں نے رام نومی میں کس طرح فساد برپا کیا جائے، اس کا ٹریننگ دیا۔ اب لوگوں کو ان کے بہار دورہ کا اصل ایجنڈا پتہ چل رہا ہے۔“