مودی آج وارانسی میں انٹیگریٹڈ اسپتال کا افتتاح کریں گے اور امول ڈیری کا سنگ بنیادرکھیں گے

وارانسی: وزیر اعظم نریندر مودی اتر پردیش میں اپنے پارلیمانی حلقہ وارانسی میں نئے تعمیر شدہ انٹیگریٹڈ آیوش اسپتال کا آج افتتاح اور امول ڈیری پلانٹ سے جڑے 'بناس کاشی سنکل پروجیکٹ' کا سنگ بنیاد رکھنے کے ساتھ ہی کل 2095.67 کروڑ روپے کے ترقیاتی منصوبے کا تحفہ دیں گے۔

قابل ذکر ہے کہ اگلے سال اتر پردیش میں ممکنہ اسمبلی انتخابات کے اعلان سے قبل وزیر اعظم مودی کاگزشتہ دس دنوں میں وارانسی کا یہ دوسرا دورہ ہے۔ اس سے پہلےوہ 13 دسمبر کو کاشی وشوناتھ دھام کمپلیکس کے افتتاح کے لیے آئے تھے۔

وزیر اعظم مودی کی جانب سے وارانسی میں عوام کے لیے وقف کی جانے والی اسکیموں میں نوتعمیرشدہ انٹیگریٹڈ آیوش اسپتال سمیت 870.16 کروڑ روپے کی لاگت سے تعمیر 22 پروجیکٹس کے علاوہ سنگ بنیادکے 1225.51 کروڑ روپے کے پانچ پروجیکٹ شامل ہیں۔

وزیر اعظم کے پروگرام کے مطابق وہ جمعرات کو دوپہر ایک بجے وارانسی میں ان پروجیکٹوں کاتحفہ پیش کریں گے۔ اس موقع پر اتر پردیش کے وزیر اعلی یوگی آدتیہ ناتھ بھی موجود رہیں گے۔

کل رات ایک ٹویٹ میں، مودی نے کہا، ’’میرے پارلیمانی حلقہ کے ساتھ پورے اتر پردیش کے لئے کل کا دن ترقیاتی کاموں کے لئے وقف ہوگا۔ تقریباً ایک بجے وارانسی میں کئی پروجیکٹوں کا افتتاح اور سنگ بنیاد رکھنے کی سعادت نصیب ہوگی۔ اس سے ریاست کی معیشت کے ساتھ ساتھ کسان بھائیوں اور بہنوں کو بھی فائدہ ہوگا۔

یوگی نے بھی کل رات سوشل میڈیا پر کہا، "وزیر اعظم مودی جی کل وارانسی میں 'بناس ڈیری سنکول' کا سنگ بنیاد رکھنے کے ساتھ ہی کئی ترقیاتی پروجیکٹوں کا افتتاح / سنگ بنیاد رکھیں گے۔ کاشی کی ترقی کے سفر کو نئی جہت دیتے اس انعقاد میں میں بھی شامل رہوں گا۔

وزیراعظم نریندرمودی آج وارانسی واقع امول کیمپس میں پلانٹ کا سنگ بنیاد رکھنے کے بعد پنڈرہ تحصیل میں دیگر ترقیاتی اسکیموں کا افتتاح اور سنگ بنیاد رکھنے کے علاوہ کارکھیانو میں ایک جلسہ عام سے بھی خطاب کریں گے۔ اس دوران وہ اتر پردیش کے 20 لاکھ خاندانوں کو جائیداد کاآن لائن مالکانہ حق جاری کریں گے۔ ان میں وارانسی کے تقریباً 35 ہزار خاندان شامل ہیں۔