’میرا بھاشن ہی میرا پرشاسن ہے‘ مودی کا اصول!

نئی دہلی: کانگریس نے کہا کہ مودی حکومت ہر شعبہ میں ناکام ثابت ہوئی ہے اور وہ ’’میرا بھاشن ہی میرا پرشاسن ہے‘‘ کے اصول پر کام کر رہی ہے۔ ساتھ ہی بی ایچ یو میں سیکورٹی کا مطالبہ کرتے ہوئے مظاہر ہ کر رہی طالبات پر پولس لاٹھی چارج کی مذمت کرتے ہوئے صدر جمہوریہ رام ناتھ کووند سے یونیورسٹی کے وائس چانسلر کو فوراً برخاست کرکے سپریم کورٹ کے جج سے اس معاملے کی جانچ کرانے کا مطالبہ کیا۔

کانگریس کے ترجمان منیش تیواری نے یہاں صحافیوں سے کہا کہ کسی بھی حکومت کی کامیابی اس کی سماجی ہم آہنگی ، داخلی سلامتی، اقتصادی بندوبست اور سفارت کاری جیسے کچھ شعبوں میں اختیار کیے گئے پیمانوں پر مبنی ہوتی ہے لیکن مودی حکومت ان سبھی پیمانوں پر ناکام ثابت ہوئی ہے۔ مودی حکومت میں غیر اعلانیہ ایمرجنسی جیسی صورت حال ہے اور یہاں وزیر عظم نریندر مودی کی تقریروں کو ہی پرشاسن مانا جاتا ہے۔ انہوں نے کہا کہ بدعنوانی اور بے روزگاری اور مہنگائی کو موضوع بناکر مودی حکومت نے پچھلے عام انتخابات میں لوگوں کو گمراہ کیا اور اکثریت حاصل کرلی لیکن اب تک جو چالیس ماہ کی حکمرانی کی ہے اس سے یہ ثابت ہوگیا ہے کہ بی جے پی کو حکومت چلانی نہیں آتی ہے۔ تیواری نے کہا کہ مودی حکومت کے اب تک کےدور اقتدار میں سماجی ماحول خراب ہوا ہے اور داخلی سلامتی کی سطح بہت خراب ہوئی ہے۔

کانگریس کے ساتھ دیگر اپوزیشن پارٹیوں نیز طلباء تنظیموں نے اس واقعہ کی سخت مذمت کرتے ہوئے بی ایچ یو کے وائس چانسلر کو فوراً برخاست کرنے اور معاملے کی سپریم کورٹ کے جج سے جانچ کرانے کا مطالبہ کیا ہے۔

دریں اثنا وزیر اعظم نریندر مودی نے بنارس ہندی یونیورسٹی (بی ایچ یو) میں پیش آنے والے واقعہ کے معاملے میں خاموشی توڑتے ہوئے اترپردیش کے وزیر اعلی یوگی آدتیہ ناتھ سے بات کی اور اس معاملے کو فوراً حل کرنے کا حکم دیا۔ دوسری طرف طلباء اور سماجی تنظیموں نے بھی اس واقعہ کے خلاف راجدھانی دہلی میں کئی مقامات پر احتجاجی مظاہرہ کیا ہے۔