مودی صرف بڑی بات کرتے ہیں، جھوٹے وعدے کرتے ہیں: ممتا بنرجی

بشنو پور: مغربی بنگال کی وزیر اعلی اور ترنمول کانگریس کی سربراہ ممتا بنرجی نے الزام عائد کرتے ہوئے کہا کہ وزیر اعظم نریندر مودی صرف بڑی باتیں کرتے ہیں، ہر ایک کے اکاؤنٹ میں 15 لاکھ روپے جمع کروانے جیسے جھوٹے وعدے کرتے ہیں لیکن ایل پی جی کی قیمتیں آسمان کو چھو رہی ہیں اور وہ انہیں کم کرنے کو تیار نہیں ہیں۔

ممتا بنرجی نے ایک جلسہ عام سے خطاب کرتے ہوئے کہا ’’میں وزیر اعظم کی کرسی کا احترام کرتی ہوں لیکن افسوس کے ساتھ کہنا پڑتا ہے کہ نریندر مودی بہت جھوٹے ہیں۔ وہ صرف جھوٹ بولتے ہیں۔ غنڈے کون ہیں؟ آج بی جے پی کے تشدد کی وجہ سے یو پی میں آئی پی ایس افسر اپنی ملازمت چھوڑ رہے ہیں۔ وہ (بی جے پی) باہر سے غنڈے لاتے ہیں، وہ ہماری ثقافت کو تباہ کر رہے ہیں۔‘‘

ٹی ایم سی کے سپریمو نے کہا کہ انتخابات سے قبل مشکلات سے بچنے کے لئے یو پی جیسی ریاستوں سے لوگوں کو لایا جا رہا ہے اور بیرونی غنڈوں کی مدد سے بنگال کو فتح کرنے کی کوشش کی جا رہی ہے۔ بنرجی نے مزید کہا کہ وہ ’بیٹی پڑھائو۔ بیٹی بچاؤ‘ کانعرہ لگاتے ہیں مگر اس اسکیم پر ایک روپیہ بھی خرچ نہیں کیا گیا۔ اس کے باوجود ہماری حکومت لڑکیوں کو 1000 سے 500 روپے کے وظائف مہیا کرتی ہے۔

اس سے قبل، ترنمول کانگریس کی رکن پارلیمنٹ مہوا موئترا نے مغربی بنگال کے بی جے پی صدر کی تقریر پر تنقید کرتے ہوئے کہا کہ بی جے پی تہذیب و تمدن کو فراموش کر دیا ہے۔ بی جے پی کے ریاستی صدر مبینہ طور پر عوامی جلسہ میں پوچھ رہے ہیں کہ وزیر اعلی ممتا بنرجی نے ساڑی کیوں پہن رکھی ہے؟ انہیں اپنی زخمی ٹانگ کو بہتر طور پر ظاہر کرنے کے لئے شارٹس کپڑے پہننے چاہئیں۔ موئیترا نے کہا کہ یہ بیان بی جے پی کی ذہنت کی عکاسی کرتا ہے۔