مودی کا دور ختم ہوگیا، یہ تبدیلی کا وقت ہے: راہل

نئی دہلی: کانگریس صدر راہل گاندھی نے وزیر اعظم نریندر مودی پر راست حملہ کرتے ہوئے کہا کہ ملک میں تبدیلی کی لہر چل رہی ہے اور ہر ووٹر کانگریس کو ووٹ دے رہا ہے۔

راہل گاندھی نے ٹوئٹ کیا ’’کانگریس کی ’نیائے اسکیم‘ سے متاثر ہوکر پورے ملک میں نہ صرف نوجوان بلکہ تجربہ کار اور بزرگ ووٹر بھی اس اسکیم کی طاقت کو سمجھ رہا ہے۔ اس لئے سبھی بڑی تعداد میں ووٹنگ کر رہے ہیں‘‘۔ مودی جی آپ کا وقت اب پورا ہوگیا ہے اور وقت کا بدلاؤ جاری ہے‘‘۔ اس کے ساتھ ہی انہوں نے ایک ویڈیو بھی پوسٹ کیا ہے جس میں ووٹ کی طاقت سے ملک کو بدلتے دیکھا ہے، پہلا ووٹ 1962میں دیا تھا، اب ہوگا نیائے کے لئے۔

کانگریس صدر نے فیس بک وال پر بھی ایک پوسٹ کیا ہے جس میں مہنگائی کم کرنے کیلئے لوگوں سے کانگریس کو اقتدار سونپنے کی اپیل کر رہے ہیں۔ انہوں نے لکھا ’’ہم سمجھتے ہیں، بڑھتی قیمتوں نے عام آدمی کی زندگی پر بھاری بوجھ ڈالا ہے۔ اس بوجھ کو کم کرنے کے لئے کانگریس پارٹی پیٹرول اور ڈیزل کو جی ایس ٹی کو دائرے میں لائے گی اور بڑھتی قیمتوں کو کم کرنے میں مدد کرے گی‘‘۔

ایک دیگر پوسٹ میں کانگریس نے وعدہ کرتے ہوئے کہا کہ حکومت بننے کے 3 مہینے کے اندر قومی انسداد دہشت گردی مرکز (نیشنل کاؤنٹر ٹیررازم سینٹر) کا قیام کر دیا جائے گا۔ اس سے قبل راہل گاندھی یہ بھی وعدہ کر چکے ہیں کہ ان کی حکومت بر سر اقتدار آنے پر پیرا ملٹری فورسز کے ہلاک ہونے والے جوانوں کو بھی فوجی جوانوں کی طرح شہید کا درجہ دیا جائے گا۔

(یو این آئی ان پٹ کے ساتھ)