مودی ریزرویشن کے خلاف ہیں اور وہ اسے ختم کرنا چاہتے ہیں، عادل آباد میں راہل گاندھی کا بیان

کانگریس لیڈر راہل گاندھی نے ریزرویشن کے حوالے سے پی ایم مودی پر سخت حملہ کیا ہے۔ انہوں نے کہا ہے کہ پی ایم مودی ریزرویشن کے خلاف ہیں اور وہ ریزرویشن کو ختم کرنا چاہتے ہیں۔ پرائیویٹائزیشن کے بہانے مودی حکومت عوامی شعبہ کے ریزرویشن کو ختم کرنے کابھی منصوبہ رکھتی ہے۔ وہ تلنگانہ کے عادل آباد لوک سبھا حلقہ کے نرمل میں ایک انتخابی ریلی سے خطاب کر رہے تھے۔

کانگریس کے لیڈر نے دعویٰ کیا کہ موجودہ لوک سبھا انتخابات دو نظریات کے درمیان ہیں۔ کانگریس ملک کے آئین کو بچانے کی کوشش کررہی ہے جب کہ بی جے پی، آرایس ایس مشترکہ طورپرعوام کے حقوق کو ختم کرناچاہتی ہیں۔ انڈیا الائنس دستور کا تحفظ کرنا چاہتا ہے جب کہ این ڈی اے الائنس آئین کوتبدیل کرنا چاہتا ہے۔ اگرغلطی سے تیسری مرتبہ بی جے پی مرکز میں برسراقتدارآگئی تو وہ آئین کو بدل کررکھ دے گی۔ راہل گاندھی نے کہا کہ مودی ریزرویشن کے خلاف ہیں۔ وہ عوام سے ریزرویشن کا حق چھیننا چاہتے ہیں۔ ملک میں سب سے بڑامسئلہ ریزرویشن کی حد میں 50 فیصد کا اضافہ کرنا ہے۔ کانگریس نے اپنے منشور میں وعدہ کیا ہے کہ اگرمرکز میں اس کی پارٹی کی حکومت بنتی ہے تو وہ ریزرویشن میں 50 فیصد کی حد اضافہ کرے گی۔

راہل گاندھی نے پوچھا کہ کیا مرکز کی بی جے پی حکومت غریب کسانوں کے قرضہ جات معاف کرے گی؟ انہوں نے مرکز کی بی جے پی حکومت پرتنقید کرتے ہوئے کہا کہ بے روزگاری میں اضافہ ہورہا ہے اور بی جے پی حکومت خاموش ہے۔ راہل گاندھی نے کہا کہ بے روزگاری کے مسئلہ کے حل کے لیے کانگریس حکومت روزگار گارنٹی اسکیم پر عمل کرے گی۔ اس اسکیم کے تحت گریجویٹس اورڈپلومہ کیے ہوئے نوجوانوں کو ایک سال کی اپرینٹس شپ دی جائے گی اور ان کوماہانہ اعزازیہ کے طورپر8500 روپئے دیئے جائیں گے۔ یہ دنیا کی اپنی نوعیت کی پہلی روزگاراسکیم ہوگی۔

راہل گاندھی نے کہا کہ مرکز میں برسرِ اقتدار آنے کے بعد ہم ان 30 لاکھ سرکاری ملازمتوں کو پر کریں گے جو نریندرمودی حکوت نے خالی رکھ چھوڑا ہے۔ انہوں نے ریاست میں قبائلیوں کے مسائل کی نشاندہی کرتے ہوئے کہاکہ کانگریس حکومت ان کے اراضی کے مسائل جلد از جلد حل کرے گی۔ مرکزی اورریاستی حکومتیں عوام کے حقوق کا تحفظ کریں گی۔عوام کے پانی، جنگل اورزمین کے حق کا بھی تحفظ کیاجائے گا۔