مودی اشتہارات کے ’ہیرو‘ لیکن ترقی کے ’ویلین‘: کانگریس

نئی دہلی: کانگریس نے وزیر اعظم نریندر مودی پر پانچ سال میں زمینی سطح پر کام نہیں کرنے اورعوام کا پیسہ اشتہارات پر خرچ کرنے کا الزام لگاتے ہوئے کہا ہے کہ بھارتیہ جنتا پارٹی جھوٹ کی بیساکھی پر الیکشن لڑ رہی ہے اور وہ اپنی مدت کار کا رپورٹ کارڈ نہیں دے پا رہی ہے۔

کانگریس کے ترجمان جے ویر شیر گل نے بدھ کے روز یہاں صحافیوں سے کہا کہ انتخابی مہم میں بی جے پی اور نریندر مودی مسلسل جھوٹ بول رہے ہیں کیونکہ ان کے پاس ترقی کے نام پر عوام کو بتانے کے لئے کچھ بھی نہیں ہے۔ کانگریس ہندوستان کی ترقی کی بات کر کے الیکشن لڑ رہی ہے لیکن مودی اور بی جے پی کے پاس ترقی کے نام پر کچھ کہنے کو نہیں ہے، اس لئے وہ پاکستان کے بارے میں بول کر الیکشن لڑ رہے ہیں۔

انہوں نے کہا کہ جس اجولا اسکیم کے تحت گُڈی نام کی ایک خاتون کو سلنڈر دے کر تصویریں كھنچوائی گئیں اور تشہر کو رفتار دی گئی تھی اس گُڈی کے پاس تین سال بعد سلنڈر خریدنے کے لئے پیسہ نہیں ہیں۔اسکیم کے تحت ہر سال 12 سلنڈر دینے کی بات تھی لیکن یہاں تین سال میں صرف ایک سلنڈر ہی اسے ملا ہے۔ اس کا کہنا ہے کہ وہ پھر چولہے پر روٹی پکانے پر مجبور ہے۔

جے ویر شیرگل نے کہا کہ پی ایم مودی میں آج گُڈی کے سامنے کھڑے ہونے کی ہمت نہیں ہے اور یہی حکومت کی اجولا جیسی تمام اسکیموں کی حقیقت ہے۔ کانگریس ترجمان نے کہا کہ مودی کو صرف تشہیر کا شوق ہے۔ پیٹرول پمپ وغیرہ مقامات پر پی ایم مودی کی تصویر والے اشتہارات لگے ہیں اور اس پر تیل کمپنیوں کو ہر ماہ 60 کروڑ روپے خرچ کرنے پڑ رہے ہیں۔ کانگریس حکومت کے وقت سلنڈر گیس کی کھپت 6.5 فیصد تھی جو مودی حکومت میں گھٹ کر 5.5 فیصد رہ گئی ہے۔

انہوں نے کہا کہ رسوئی گیس سلنڈر کی شرح میں مودی حکومت میں بے تحاشہ اضافہ ہوا ہے۔ رسوئی گیس کا جو سلنڈر 16 مئی 2014 کو 406 روپے میں مل رہا تھا وہ آج 496 روپے کا ہو گیا ہے۔ انہوں نے کہا کہ مودی حکومت کے قول اور فعل میں فرق ہے اور مودی حکومت کو اس کا خمیازہ اس الیکشن میں بھگتنا پڑ رہا ہے۔