رام مندر پر دھوکہ دینے والی مودی حکومت کو نتائج بھگتنے ہوں گے: شنکرا چاریہ دھرمیندر

جے پور: شری رام جنم بھومی مکتی آندولن کے شنکر آچاریہ دھرمیندر مہاراج نے مرکز کی مودی حکومت پر رام مندر کی تعمیر کے سلسلے میں عوام اور رام بھکتوں کو دھوکہ دینے کا الزام عائد کرتے ہوئے وارننگ دی کہ اگر فوری طور سے ایودھیا میں رام مندر تعمیر کے سلسلے میں کوئی اقدامات نہیں کیے گئے تو اس کے نتائج بھگتنے ہوں گے۔

آچاریہ مہاراج نے آج یہاں نامہ نگاروں سے کہا کہ کروڑوں رام بھکتوں کی امیدوں کی وجہ سے وزیراعظم نریندر مودی کو مکمل حمایت حاصل ہوئی تھی اور نریندر مودی نے لال قلعہ سے بھی رام مندر بنانے کے عزم کو دہرایا تھا۔ انہوں نے کہا کہ رام مندر کی تعمیر کے لئے پتھروں کی ڈھلائی اور نقاشی کا کام چل رہا ہے اورنریندر مودی کی ترجیحات رام مندر کی تعمیر کی ہونی چاہیے تھی لیکن انہوں نے اس کی اجازت کے سلسلے میں سپریم کورٹ کے فیصلے پر انحصار کر رہے ہیں۔ انہوں نے الزام عائد کرتے ہوئے کہا کہ مرکزی حکومت رام بھکتوں کی امنگوں پر کھری نہیں اتری۔ انہوں نے کہا کہ نریندر مودی کا عوامی عزم کہاں گیا وہ ایک مرتبہ بھی ایودھیا نہیں گئے، جبکہ ان کی یہ ترجیحات ہونی چاہیے تھی۔

(یواین آئی ان پٹ کے ساتھ)