کورونا سے پریشان عوام مہنگائی سے مزید بے حال، مودی حکومت ذمہ دار: اجے ماکن

بھوپال: کانگریس کے جنرل سکریٹری اجے ماکن نے ملک میں ضروری اشیا اور پٹرولیم مصنوعات کی قیمتوں میں مسلسل اضافہ کے لئے آج مرکز کی بھارتیہ جنتا پارٹی (بی جے پی) کی قیادت والی حکومت کی پالیسیوں کو ذمہ دار ٹھہراتے ہوئے کہا کہ اس پر کنٹرول کے لئے فوری طورپر اقدامات کیے جانے چاہئیں۔

سابق مرکزی وزیر اجے ماکن نے یہاں نامہ نگاروں سے بات چیت میں کہا کہ عام لوگ کورونا اور اس کے سبب پیدا ہوئے بحران سے پریشان ہیں۔ ایسے میں ضروری اشیا کی قیمتوں میں اضافہ سے شہری مزید پریشان ہوگئے ہیں۔ پٹرول، ڈیزل اور رسوئی گیس کی قیمتوں میں مسلسل اضافہ کیا جا رہا ہے۔ ڈیزل مہنگا ہونے سے مہنگائی مزید بڑھ رہی ہے۔ ان سب کا بوجھ ملک کے عام شہریوں پر پڑ رہا ہے۔

سینئر کانگریسی لیڈر نے اعدادو شمار پیش کرتے ہوئے کہا کہ پٹرولیم مصنوعات کی قیمتوں میں اضافہ اور مہنگائی کے لئے مکمل طورپر مرکزی حکومت کی پالیسیاں ذمہ دار ہیں۔ مرکزی حکومت ضروری اشیا کی قیمتوں میں اضافہ کو کنٹرول نہیں کر پا رہی ہے۔ انہو ں نے کہا کہ اس کے برعکس مرکزی حکومت پٹرولیم مصنوعات کی قیمتوں میں اضافہ کے لئے سابقہ کانگریس حکومت کی پالیسیوں کا بہانہ بناتی ہے۔

سابق وزیر اجے ماکن نے کہا کہ مرکزی حکومت ملک کے شہریوں کے ہاتھ میں مختلف اسکیموں کے تحت رقم پہنچانے کا دعوی کرتی ہے جبکہ اصل میں مرکز کی بی جے پی کی قیادت والی حکومت اپنی ضرورت کے سامان کے لئے شہریوں کو زیادہ قیمت ادا کرنے کے لئے مجبور کر رہی ہے۔انہوں نے الزام لگایا کہ مرکزی حکومت کی پالیسیاں غریب مخالف ہیں۔ سابقہ کانگریس حکومت نے 27 کروڑ لوگوں کو ان کا حق دلاتے ہوئے خط افلاس کے تحت ملنے والے فوائد کے لئے مستحق بنایا تھا لیکن موجودہ مرکزی حکومت نے 23 کروڑ لوگوں کو پھر سے اس اسکیم سے محروم کر دیا۔

کانگریس کے لیڈر نے کہا کہ مرکزی حکومت کی پالیسیوں کی وجہ سے بنے ماحول کے سبب لاکھوں کروڑوں لوگوں کے روزگار چلے گئے ہیں۔ اپنی روزی روٹی چلانے میں لوگوں کے پسینے چھوٹ رہے ہیں اور مرکزی حکومت کی پالیسیاں لوگوں کو مزید مہنگائی سے روبرو کرا رہی ہے۔ سابق مرکزی وزیر نے کہا کہ پارٹی مانگ کرتی ہے کہ مرکزی حکومت پٹرول-ڈیزل اور رسوئی گیس کی قیمتوں میں کمی کرے اور اس طرح اقدامات کرے جن سے مہنگائی اور روزمرہ کے استعمال کی چیزوں کی قیمتوں میں کمی لائی جاسکے۔