نکاح حلالہ اور کثرت ازدواج کے خلاف بل لانے کی تیاری!

کئی میڈیا اداروں نے ذرائع کے حوالے سے خبر دی ہے کہ مودی حکومت مسلمانوں کے تعلق سے دو اہم فیصلے لینے جا رہی ہے۔ یعنی نکاح حلالہ اور کثیر ازدواج کو ختم کرنے کی تیاری شروع کردی ہے۔ اس کے علاوہ مرکزی حکومت سپریم کورٹ میں بھی نکاح حلالہ اور کثیر ازدواج کی مخالفت کرے گی۔ طلاق ثلاثہ پر بھی حکومت اپنے موقف پر قائم رہے گی۔

ذرائع کے مطابق مودی حکومت نکاح حلالہ کے ساتھ ساتھ کثیر ازدواج کو بھی ختم کرنے کے حق میں ہے۔ یہی وجہ ہے کہ نکاح حلالہ اور کثیر ازدواج کو چیلنج کرنے والی عرضیوں کے جواب میں مرکزی حکومت نے ابھی کوئی عرضی داخل نہیں کی ہے۔ ذرائع کا یہ بھی کہنا ہے کہ نکاح حلالہ اور کثیر ازدواج پر روک لگانے کے لئے حکومت طلاق ثلاثہ کی طرح ہی بل لا سکتی ہے۔

واضح رہے کہ طلاق ثلاثہ پر مودی حکومت نے جو بل پیش کیا تھا وہ ابھی تک پارلیمنٹ سے پاس نہیں ہو پایا ہے۔ لوک سبھا سے تو بل طلاق ثلاثہ کو منظور کرا لیا تھا لیکن راجیہ سبھا میں بی جے پی کی اکثریت نہ ہونے کے سبب بل منظور نہیں ہو پا یا ہے۔

کانگریس سمیت کئی اپوزیشن پارٹیوں کا مطالبہ ہے کہ طلاق ثلاثہ پر مبنی بل جلد بازی میں لایا گیا ہے اور اس میں تمام طرح کی خامیاں موجود ہیں جنہیں دور کیا جانا چاہئے۔ کئی مسلم تنظیمیں بھی مودی حکومت کے اس بل طلاق ثلاثہ کی مخالفت کر رہی ہیں۔

مسلم تنظیموں کا کہنا ہے کہ مودی حکومت ان کے مذہبی معاملات میں دخل دے رہی ہے جبکہ اس سے قبل طلاق ثلاثہ سے متعلق سپریم کورٹ نے بھی قانون سازی کی بات کی تھی۔