رڈار سے بادل چھٹے نہیں کہ مودی کے انٹرویو پر ایک اور انکشاف

وزیر اعظم کا رڈار والا بیان زبر دست مذاق کا موضوع بنا ہوا ہے او راس درمیان اس انٹرویو کی ایسی کلپ سامنے آئی ہے جس سے پتہ چلتا ہے کہ وزیر اعظم کو پہلے سے دیے سوالوں کا جواب بھی پہلے سے لکھا ہوتا ہے۔

عام انتخابات کے آخری مرحلہ کے لئے ووٹنگ میں محض چھ دن رہ گئے ہیں اور اس کے بعد یہ طے ہو جائے گا کہ مودی کی قیادت والی مرکزی حکومت اقتدار میں رہے گی یا اسے عوام بے دخل کر دیں گے۔ لیکن اس سے پہلے وزیر اعظم نے ایک ٹی وی انٹرویو میں بالا کوٹ کے تعلق سے ایک ایسا جوا ب دے دیا ہے جس میں رڈار تو بادلوں میں پھنس ہی گیا ہے، ساتھ میں ملک کی ساکھ اور وزیر اعظم کے عہدے کا وقار بھی تار تار ہو گیا ہے۔وزیر اعظم کے بیان کے بعد دفاعی ماہرین بھی اپنا سر کھجاتے نظر آ رہے ہیں۔

اب اس انٹرویو کی ایسی کلپ سامنے آئی ہے جس میں نہ صرف سوال لکھا ہوا ہے بلکہ اس کا جواب بھی لکھا ہے۔ دلچسپ بات یہ ہے کہ وزیر اعظم مودی سے کچھ سیکنڈ بعد وہی سوال پوچھا بھی جاتا ہے۔ درج ذیل میں دیے گئے لنک کو دیکھیں اور اندازہ لگائیں۔

اسی انٹرویو میں ایک اور انکشاف ہوا ہے اور وہ یہ کہ ہندوستان میں انٹر نیٹ بھلے ہی90 کی دہائی میں آیا ہو لیکن وزیر اعظم مودی کے لئے ای میل یا کسی تصویر کو ڈیجیٹل ٹرانسمٹ کرنے کی تکنیک ہندوستان میں ہی 1987-88میں شروع ہو چکی تھی۔

اس پورے انٹرویو کا بہت زیادہ مذاق بن رہا ہے۔