مشن دِویاستر: ’اگنی-5‘ میزائل کا ہوا کامیاب تجربہ، پی ایم مودی نے ڈی آر ڈی او کو دی مبارکباد

ڈی آر ڈی او کو آج اس وقت ایک بڑی کامیابی ہاتھ لگی جب اس نے ’اگنی-5‘ میزائل کا کامیاب تجربہ کیا۔ وزیر اعظم نریندر مودی نے اس کامیابی کے لیے ڈی آر ڈی او کو مبارکباد بھی پیش کی ہے۔ انھوں نے سوشل میڈیا پلیٹ فارم ایکس پر کیے گئے ایک پوسٹ میں لکھا ہے کہ ’’ملٹیپل انڈیپنڈنٹلی ٹارگیٹیبل ری-اینٹری وہیکل (ایم آئی آر وی) تکنیک کے ساتھ سودیشی طریقے سے تیار اگنی-5 میزائل کا پہلا پرواز تجربہ، مشن دِویاستر کے لیے ہمارے ڈی آر ڈی او سائنسدانوں پر فخر ہے۔‘‘

واضح رہے کہ اگنی-5 میزائل کا وزن 50 ہزار کلوگرام ہے۔ یہ 17.5 میٹر طویل ہے اور اس کا قطر 2 میٹر یعنی 6.7 فیٹ ہے۔ اس کے اوپر 1500 کلوگرام وزن کا نیوکلیائی اسلحہ لگایا جا سکتا ہے۔ اس میزائل میں تین اسٹیج کے راکیٹ بوسٹر ہیں جو سالڈ فیوئل سے پرواز بھرتے ہیں۔ اس کی رفتار آواز کی اسپیڈ سے 24 گنا زیادہ ہے۔ یعنی ایک سیکنڈ میں یہ 8.16 کلومیٹر کی دوری طے کرتی ہے۔

اگنی-5 میزائل کی ایک بڑی خاصیت یہ ہے کہ 29401 کلومیٹر فی گھنٹہ کی رفتار سے دشمن پر حملہ کرتی ہے۔ اس میں رِنگ لیزر گائیروسکوپ انرشیل نیویگیشن سسٹم، جی پی ایس، ناوِک سیٹلائٹ گائیڈنس سسٹم لگا ہوا ہے۔ اگنی-5 میزائل ہدف پر چابکدستی کے ساتھ حملہ کرتا ہے۔ اگر ہدف اپنی جگہ سے ہٹ کر 10 سے 80 میٹر تک بھی جاتا ہے تو اس کا بچنا مشکل ہے۔