کورونا نے وزارتِ محنت میں پھر دی دستک، 24 افراد پازیٹو، 2 دن کے لیے دفتر بند

دہلی میں کورونا کے بڑھتے قہر کا اندازہ اس بات سے بخوبی لگایا جا سکتا ہے کہ ایک بار پھر وزارت برائے محنت و روزگار کو سیل کرنے کی نوبت آ گئی ہے۔ دراصل وزارت سے جڑے 24 افسران و ملازمین کی کورونا ٹیسٹ رپورٹ پازیٹو برآمد ہوئی ہے جس کے بعد فیصلہ کیا گیا کہ دو دن متعلقہ عمارت کو سیل کر کے سبھی کمرے کو سینیٹائز کیا جائے۔ وزارت نے اس درمیان سبھی ملازمین کو مشورہ دیا ہے کہ وہ گھر سے کام کریں۔

ڈپٹی سکریٹری ایس کے کالرا نے وزارت کے اسٹاف کے لیے کچھ ہدایات بھی جاری کی ہے۔ انھوں نے پازیٹو ملے سبھی اسٹاف کے ناموں کی فہرست جاری کرتے ہوئے ان کے رابطہ میں آنے والوں کو 13 جون سے کم از کم ایک ہفتہ کے لیے ہوم کوارنٹائن ہونے کے لیے کہا ہے۔ خط میں یہ بھی کہا گیا ہے کہ جن اسٹاف میں کسی بھی طرح کی علامت نہیں ہے، وہ گھر سے کام کریں۔ وزارت 13 اور 14 جون کو بند رہے گا۔ اس دوران 'شرم شکتی بھون' میں سینیٹائزیشن کا کام کیا جائے گا۔

اس درمیان وزارت محنت و روزگار میں کورونا پازیٹو ملے 24 افسران و ملازمین کے رابطے میں کل 17 لوگوں کے آنے کی خبر ہے۔ وزارت نے رابطہ میں آنے والے اسٹاف کو سیلف کوارنٹائن ہونے کے لیے کہا ہے۔ یہاں قابل ذکر ہے کہ ہندوستان میں کورونا انفیکشن کے معاملے لگاتار بڑھ رہے ہیں اور دہلی میں تو حالات کچھ زیادہ ہی خراب ہیں۔ جہاں پورے ملک میں کورونا انفیکشن والے مریضوں کی تعداد 3 لاکھ کو پار کر چکی ہے، وہیں تنہا دہلی میں مریضوں کی تعداد 36 ہزار کو پار کر چکی ہے۔