آگرہ میں مگ-29 جنگی طیارہ حادثہ کا شکار، پائلٹ سمیت 2 افراد نے کھیت میں کود کر بچائی جان

اتر پردیش کے آگرہ میں ایم آئی جی-29 جنگی طیارہ حادثہ کا شکار ہو گیا ہے۔ آگرہ کے کاگارول واقع سونیگا گاؤں میں فضائیہ کا یہ طیارہ تکنیکی خامی کے سبب بے قابو ہو کر ایک کھیت میں جا گرا۔ زمین پر گرتے ہی اس طیارہ میں آگ لگ گئی اور آس پاس لوگوں کی زبردست بھیڑ اسے دیکھنے کے لیے جمع ہو گئی۔ اچھی بات یہ رہی کہ طیارہ میں سوار پائلٹ اور کو-پائلٹ دونوں کی ہی جان بچ گئی ہے۔

ڈیفنس سے جڑے افسران نے بتایا کہ ہندوستانی فضائیہ کے پائلٹ سمیت 2 لوگوں نے کھیت میں کود کر اپنی جان بچائی۔ ان کا کہنا ہے کہ مگ-29 جنگی طیارہ میں گرنے کے بعد آگ لگ گئی تھی۔ طیارہ نے پنجاب کے آدم پور سے پرواز بھری تھی اور تربیت کے لیے آگرہ جا رہا تھا تبھی یہ حادثہ پیش آیا۔ جائے حادثہ سے سامنے آئی تصویروں میں جلتے ہوئے جنگی طیارہ کے پاس لوگوں کی بھیڑ دیکھی جا سکتی ہے۔

اس حادثہ کے تعلق سے ہندوستانی فضائیہ (آئی اے ایف) کا بیان بھی سامنے آ گیا ہے۔ فضائیہ کا کہنا ہے کہ مگ-29 طیارہ آج معمول کے مطابق تربیتی پرواز کے دوران سسٹم میں خرابی کے بعد آگرہ کے پاس حادثہ کا شکار ہو گیا۔ پائلٹ نے یہ یقینی بنایا کہ زمین پر جان و مال کو کسی طرح کا نقصان نہ پہنچے۔ حادثہ کی وجہ کا پتہ لگانے کے لیے ہندوستانی فضائیہ نے تحقیقات کا حکم صادر کر دیا ہے۔

قابل ذکر ہے کہ یہ پہلی بار نہیں ہے جب مگ-29 جنگی طیارہ حادثہ کا شکار ہوا ہے۔ رواں سال 2 ستمبر کو راجستھان کے باڑمیر میں بھی ایک مگ-29 جنگی طیارہ تکنیکی خرابی کے سبب حادثہ کا شکار ہو گیا تھا۔ تب بھی وقت رہتے پائلٹ طیارہ سے باہر نکلنے میں کامیاب رہا تھا۔