’میٹرو مین‘ نے بھی دیا متنازعہ بیان، کہا ’پی ایم مودی کے ناقدین محب وطن نہیں‘

اسی سال فروری ماہ میں بی جے پی جوائن کرنے والے اور ’میٹرو مین‘ کے نام سے مشہور ای. شری دھرن نے پی ایم مودی کی تنقید کرنے والوں کی پرزور الفاظ میں مذمت کی ہے۔ انھوں نے نہ صرف ناقدین کی مذمت کی ہے بلکہ ایک ایسا متنازعہ بیان بھی دے دیا ہے جس سے ظاہر ہو رہا ہے کہ وہ بھی اب بی جے پی کے شعلہ بیان لیڈروں کی زبان استعمال کر رہے ہیں۔ دراصل انھوں نے بی بی سی کو دیے گئے ایک انٹرویو میں کہا کہ ’’ایسے لوگ، جو بے وجہ پی ایم مودی کو تنقید کا نشانہ بناتے ہیں، محب وطن نہیں ہو سکتے۔‘‘ انھوں نے یہ بھی کہا کہ پی ایم مودی نے اپنی مدت کار میں ملک کی شبیہ بہتر بنانے کے لیے کئی بڑے اقدام اٹھائے ہیں۔

بی بی سی کو دیے گئے انٹرویو میں شری دھرن نے پی ایم مودی کے حق میں آواز اٹھاتے ہوئے ان کے ناقدین پر خوب حملہ کیا۔ انھوں نے کہا کہ ’’پی ایم مودی کی تنقید کرنے والے لوگ دراصل بی جے پی کے خلاف ہیں، اور یہ لوگ نہیں چاہتے کہ بی جے پی کبھی اقتدار میں رہے۔‘‘ میٹرو مین نے مزید کہا کہ ’’اگر مودی کی تنقید صرف حکومت کی شبیہ کو خراب کرنے کے لیے کی جا رہی ہے تو یہ ملک کے خلاف ہے۔‘‘

جب شری دھرن سے حال ہی میں کئی غیر ملکی اداروں کی طرف سے ہندوستان کی جمہوریت پر فکر ظاہر کیے جانے کے متعلق رد عمل جاننے کی کوشش کی گئی تو انھوں نے کہا کہ ’’ایسے ادارے ہندوستان میں جو کچھ ہو رہا ہے، اس سے بہت جلتی ہیں۔ آج ہندوستان کی فوج مضبوط ہوئی ہے۔ اس لیے یہ لوگ اس سے جلتے ہیں۔ آج ہندوستان کی فوج دنیا کی چوتھی سب سے طاقتور فوج ہے۔‘‘