’میہُل چوکسی کو ہندوستان بھیجا جائے‘ ڈومینیکا حکومت کا عدالت میں بیان

نئی دہلی: مفرور ہیرا تاجر میہُل چوکسی کو ہندوستان لانے کی کوششیں کامیاب ہوتی نظر آ رہی ہیں۔ انٹیگوا سے فرار ہونے کے بعد ڈومینیکا میں گرفتار ہونے والے میہل چوکسی کو حوالگی کے ذریعے ہندوستان بھیجے جانے کی وکالت وہاں کی حکومت نے عدالت سے کی ہے۔

دراصل، میہل چوکسی کو میہل چوکسی کے وکلا نے اسے حوالگی کے ذریعے ہندوستان بھیجنے کی مخالفت کرتے ہوئے ایسٹ کیربین سپریم کورٹ میں عرضی داخل کی ہے۔ وکلا نے کہا ہندوستانی آئین کی دفعہ 9 کہتی ہے کہ ایسا شخص جو کسی دوسری ملک کی شہریت رکھتا ہے اس کی ہندوستانی شہریت خوبخود منسوخ ہو جاتی ہے، لہذا چوکسی ہندوستانی شہری نہیں ہے۔ وکلا نے مزید کہا کہ چوکسی کو براہ راست حوالگی کے ذریعے ہندوستان نہیں بھیجا جا سکتا ہے۔

انٹیگوا کی حکومت پہلے ہی کہہ چکی ہے کہ قوانین کی خلاف ورزی کرنے والے میہل چوکسی کو فوری طور پر ہندوستان بھیجا جانا چاہیئے۔ انٹیگوا حکومت اسے واپس نہیں لینا چاہتی۔ ڈومینیکا کی پولیس پہلے ہی چوکسی کے ان الزامات کی تردید کر چکی ہے کہ اس کو اغوا کر کے ڈومینیکا لایا گیا ہے۔ اسے زد و کوب کرنے کی بھی پولیس نے تردید کی ہے۔

خیال رہے کہ ہندوستان نے سی بی آئی اور وزارت برائے خارجی امور کے عہدیداران سمیت 8 افراد پر مشتمل ایک ٹیم ڈومینیکا بھیجی ہے تاکہ میہل چوکسی کو حوالگی کے ذریعے ہندوستان لایا جا سکے۔ کہا جاتا ہے کہ ایک نجی طیارہ چوکسی معاملہ سے متعلق دستاویزات کو لے کر 28 مئی کو ڈومینیکا پہنچ گیا تھا۔

ادھر، ہندوستان میں موجود چوکسی کے وکیل وجے اگروال نے کہا ہے کہ اس کے بھائی چیتن چوکسی 28 مئی کو ڈومینیکا پہنچ گئے تھے تاکہ ہیرا تاجر کی صحیح طریقہ سے طبی دیکھ بھال کی جا سکے۔

خبروں کے مطابق میہل چوکسی انٹیگوا سے ڈومینیکا کے راستے کیوبا فرار ہونے کی فراق میں تھا تاکہ وہ حوالگی کے ذریعے ہندوستان جانے سے بچ جائے لیکن اس کا یہ داؤ الٹا پڑ گیا۔ حکومت ہند لگاتار یہ دلیل دے ہی ہے کہ چوکسی آج بھی ہندوستانی شہری ہے چونکہ حکومت نے اس کی شہریت کو کبھی منسوخ نہیں کیا ہے۔

میہل چوکسی ویڈیو کانفرنسنگ کے ذریعے سماعت میں شامل ہوا۔ وہ فی الحال اسپتال میں ہے جہاں اس کے زخموں کا علاج چل رہا ہے۔ جبکہ اس کے وکلا جسٹن سیمون اور جان کارنگٹن نے عدالت میں کہا ہے کہ چوکسی کو انٹیگوا سے اغوا کرکے ڈومینیکا لایا گیا ہے۔ تاحال عدالت نے اپنا فیصلہ نہیں سنایا ہے۔