میگھالیہ: وزیر اعلیٰ دفتر پر حملہ کے الزام میں بی جے پی کی 2 خاتون لیڈران سمیت 18 افراد کی گرفتاری

میگھالیہ میں پیر کی شام وزیر اعلیٰ دفتر پر بھیڑ کے ذریعہ کیے گئے حملے میں آج بڑی کارروائی کی گئی ہے۔ مغربی تورا شہر میں واقع وزیر اعلیٰ دفتر پر حملے کے الزام میں پولیس نے 18 افراد کو گرفتار کیا ہے۔ گرفتار شدگان میں بی جے پی کی 2 خاتون لیڈران (بیلینا مراک اور دلچے مراک) بھی شامل ہیں۔ وزیر اعلیٰ دفتر پر حملے کے لیے اکسانے کا الزام 2 ترنمول کانگریس لیڈران پر لگا ہے جن کی تلاش پولیس کے ذریعہ کی جا رہی ہے۔

قابل ذکر ہے کہ اچک کانسیس ہالسٹیکلی انٹگریٹیڈ کریما اور گارو ہلز اسٹیٹ موومنٹ کمیٹی کے لیڈران تورا کو ریاست کی سرمائی راجدھانی بنانے کا مطالبہ کر رہے ہیں۔ اس تعل قسے پیر کی شام وزیر اعلیٰ کونراڈ سنگما مظاہرین سے ملاقات کے لیے اپنے دفتر پہنچے تھے۔ جب وزیر اعلیٰ دفتر میں وزیر اعلیٰ مظاہرین سے بات چیت کر رہے تھے، تبھی لوگوں کی بڑی بھیڑ نے دفتر پر حملہ کر دیا تھا۔ اس حملے میں وزیر اعلیٰ کونراڈ سنگما کو تو کوئی نقصان نہیں پہنچا، لیکن 5 سیکورٹی اہلکار زخمی ہو گئے تھے۔

بھیڑ کے حملہ سے وزیر اعلیٰ دفتر میں افرا تفری کا ماحول پیدا ہو گیا تھا اور اس بھیڑ کو منتشر کرنے کے لیے پولیس کو آنسو گیس کے گولے داغنے پڑے تھے۔ بہت مشقتوں کے بعد حالات پر قابو پایا گیا تھا۔ بعد ازاں وزیر اعلیٰ نے زخمی سیکورٹی اہلکاروں کی عیادت کی تھی اور ان کے علاج کا پورا انتظام کرنے کی ہدایت ذمہ داران کو دی تھی۔ ساتھ ہی زخمیوں کے لیے 50-50 ہزار روپے امدادی رقم دینے کا بھی اعلان کیا تھا۔

کشیدہ حالات کو دیکھتے ہوئے ضلع کے ڈپٹی کمشنر جگدیش چیلانی نے تورا شہر میں رات کے وقت کرفیو لگا دیا تھا۔ احتیاطاً تورا شہر میں منگل کے روز سبھی تعلیمی اداروں کو بند کرنے کا بھی فیصلہ لیا گیا، حالانکہ سبھی بازار آج معمول کے کھلے ہوئے ہیں۔