ہنگامہ آرائی کے بعد ایم سی ڈی کی قائمہ کمیٹی کے الیکشن کا آج نئے سرے سے اہتمام

نئی دہلی: ایم سی ڈی اسٹینڈنگ کمیٹی (قائمہ کمیٹی) کے الیکشن کا اہتمام آج نئے سرے سے رہا ہے۔ اس کا اعلان میئر شیلی اوبرائے نے کیا ہے۔ ووٹنگ کے دوران کسی بھی کونسلر کو موبائل فون ساتھ لے جانے کی اجازت نہیں ہوگی۔ بی جے پی اس کو لے کر مسلسل جارحانہ تھی اور گزشتہ دو دنوں سے دہلی میونسپل کارپوریشن میں اس کو لے کر ہنگامہ جاری تھا۔ ایم سی ڈی میں عام آدمی پارٹی اور بی جے پی دونوں کے کونسلر ووٹ ڈال رہے ہیں۔

بی جے پی نے الزام لگایا کہ عام آدمی پارٹی کے میئر نے اسٹینڈنگ کمیٹی کے لیے ووٹنگ کے دوران ممبران کو موبائل فون لے جانے کی اجازت دی، انہوں نے کراس ووٹنگ کے خوف سے ایسا کیا۔ یہ خفیہ رائے شماری کی خلاف ورزی ہے۔ اب اس پر بی جے پی کی بات کو میئر تک لے جانے کے بعد امید کی جا رہی ہے کہ ایم سی ڈی کی اسٹینڈنگ کمیٹی کا انتخاب آج مکمل ہو جائے گا۔

ایم سی ڈی کی قائمہ کمیٹی کے 6 ارکان کا انتخاب آج ہو رہا ہے۔ عآپ نے 4 سیٹوں پر امیدوار کھڑے کئے ہیں اور بی جے پی کے 3 امیدوار ہیں۔ ایسے میں دونوں جماعتوں میں سے کسی ایک کے امیدوار کی شکست یقینی ہے۔ یہی وجہ ہے دونوں پارٹیاں ایک ایک ووٹ کے لیے لڑ رہی ہیں۔

دریں اثنا، بوانا وارڈ سے عام آدمی پارٹی کے کونسلر پون سہراوت نے بھارتیہ جنتا پارٹی (بی جے پی) میں شمولیت اختیار کر لی۔ پون سہراوت نے کہا کہ انہوں نے اخلاقیات کی بنیاد پر عآپ کو خیرباد کہہ دیا ہے۔ انہوں نے یہ بھی دعوی لگایا کہ وہ عآپ کونسلروں کو ایم سی ڈی ہاؤس میٹنگ میں ہنگامہ کرنے کی ہدایت دینے پر ناراض تھے۔