ایم سی ڈی قائمہ کمیٹی الیکشن: عآپ کے خلاف سپریم کورٹ سے رجوع کرے گی بی جے پی، کل دن بھر ہوا تھا ہنگامہ

نئی دہلی: ایم سی ڈی میں قائمہ کمیٹی کے انتخاب کے دوران کل جمعہ (24 فروری) کو مسلسل تیسرے دن ہنگامہ آرائی کے بعد ایوان کی کارروائی پیر کی صبح تک کے لئے ملتوی کر دی گئی۔ میئر شیلی اوبرائے نے اعلان کیا کہ اسٹینڈنگ کمیٹی کے ارکان کے انتخاب کے لیے دوبارہ انتخاب 27 فروری کو 11 بجے ہوں گے۔ بجے ہوں گے۔ دریں اثنا، آج بی جے پی نے اعلان کیا ہے کہ وہ اسٹینڈنگ کمیٹی کے انتخاب پر عام آدمی پارٹی کے خلاف سپریم کورٹ میں عرضی داخل کرے گی۔

خیال رہے کہ عام آدمی پارٹی کے اعتراض کے بعد جمعہ کو ایم سی ڈی کی اسٹینڈنگ کمیٹی کے ارکان کے انتخاب کے لیے ووٹوں کی دوبارہ گنتی کو روکے جانے کے بعد ہنگامہ برپا ہو گیا۔ بی جے پی اور عآپ کونسلروں نے ایوان کے تقدس کو نظر انداز کرتے ہوئے ایک دوسرے پر حملہ کیا۔ دوبارہ گنتی کے عمل کو روکنے کے میئر کے فیصلے کے خلاف احتجاج کرتے ہوئے بی جے پی کونسلروں نے نعرے بازی کی۔ دریں اثنا، مائیک توڑے گئے، بیلٹ پیپر پھاڑے گئے اور پولنگ کے بکسوں کو نقصان پہنچایا گیا۔

ایوان میں دونوں طرف کے کونسلروں کی طرف سے نعرے بازی کے درمیان میئر شیلی اوبرائے نے کہا ’’اسٹینڈنگ کمیٹی کے ارکان کے انتخاب کے لیے ووٹنگ 27 فروری کو ہوگی۔‘‘ ایوان کی کارروائی ملتوی ہونے کے بعد میڈیا سے خطاب کرتے ہوئے اوبرائے نے کہا کہ آج کا دن سب سے افسوسناک ہے۔ ایوان کے وقار کا خیال نہیں رکھا گیا۔ اسٹینڈنگ کمیٹی کے انتخاب سے پہلے ہم نے بی جے پی کے مطالبات کو سنا اور ان کی تکمیل کو یقینی بنایا لیکن جب ووٹوں کی گنتی شروع ہوئی اور انہیں (بی جے پی) احساس ہوا کہ وہ ہار رہے ہیں تو بی جے پی کے کونسلروں نے ہنگامہ کھڑا کر دیا۔

اوبرائے نے کہا ’’انہوں نے نہ صرف مجھے بلکہ دیگر خواتین کونسلروں کو بھی نشانہ بنایا۔ وہ نہ صرف ایوان کی بلکہ میئر کی کرسی کی بھی بے عزتی کر رہے ہیں۔ آج میں بی جے پی سے ہار ماننے کی اپیل کرنا چاہتی ہوں۔‘‘

اس ہنگامے کے بعد عآپ کے کونسلر نے جمعہ کی دیر رات کملا مارکیٹ پولیس اسٹیشن میں احتجاج کرتے ہوئے بی جے پی کونسلروں کے خلاف شکایت درج کرنے کا مطالبہ کیا۔ دہلی کی نئی میئر شیلی اوبرائے اپنی ٹیم کے ساتھ بی جے پی کونسلروں کی شکایت کرنے پولیس اسٹیشن پہنچی تھیں۔ اس کے علاوہ انہوں نے پولیس تحفظ کا بھی مطالبہ کیا۔

دوسری طرف بی جے پی کی کونسلر میناکشی شرما نے کملا مارکیٹ پولیس اسٹیشن میں عآپ کونسلروں کے خلاف مجرمانہ حملہ اور بی جے پی کی خواتین کارپوریٹروں کو سنگین چوٹ پہنچانے اور جان کو خطرے میں ڈالنے کے الزام میں شکایت درج کرائی۔