مولانا آزاد: قید فرنگ میں

وطن عزیز کی جنگ آزادی کے روح رواں ابوالکلام محی الدین احمد یعنی مولانا آزاد کسی تعارف کے محتاج نہیں۔ وہ کثیر الجہت اور ہمہ گیر شخصیت کے مالک تھے، جو انڈین نیشنل کانگریس کے سب سے کم عمر اور چھٹے مسلم صدر تھے۔ اگر وہ چاہتے تو مصلحت کی چادر اوڑھ کر اپنے شب و روز عیش وعشرت کے ساتھ گزار دیتے، لیکن انہوں نے اپنی زندگی برطانوی نو آبادیاتی نظام کی غلامی سے نجات کے لیے وقف کر دی، جس کی انہیں بہت بڑی قیمت ادا کرنی پڑی۔

برطانوی استعمارسے ٹکرانے کی پاداش میں مسلسل قید وبند کی صعوبتیں برداشت کرتے رہے۔ ان کا ایک پیر ریل میں اور دوسرا جیل میں رہتا تھا۔ مولانا آزاد کے تخمینہ کے مطابق ان کی عمر عزیز کے تقریباً 10 سال 7 مہینے نذر زندان ہوئے، یعنی ان کی زندگی کا ہر ساتواں دن قید فرنگ میں گزرا۔

مولانا آزاد غبار خاطر کے ایک خط مورخہ 11 اگست 1942ء میں اپنی سزاﺅں کی بابت لکھتے ہیں کہ:

’’قید و بند کی زندگی کا یہ چھٹا تجربہ ہے۔ پہلا تجربہ 1916ء میں پیش آیا تھا، جب مسلسل 4 برس تک قید و بند میں رہا، پھر 1921ء، 1931ء، 1932ء اور 1940ء میں یکے بعد دیگرے یہی منزل پیش آتی رہی اور اب پھر اسی منزل پر قافلہ باد پیمائے عمر گزر رہا ہے... البتہ اس کا افسوس ضرور ہے کہ وہ ساتوں حصّے کی مناسبت کی بات مختل ہو گئی اور سبت کی تعطیل کا معاملہ ہاتھ سے نکل گیا۔‘‘

مولانا آزاد نے اندازے کے مطابق جو اپنی سزاؤں کی اجمالی مدت لکھی ہے، وہ دستاویز اور اخبارات کی ورق گردانی کے بعد کم و بیش درست بیٹھتی ہے۔ ان کی گرفتاریوں کی مدت سلسلہ وار اس طرح ہے:

ان کی پہلی گرفتاری: حکومت بنگال نے ڈیفنس آف انڈیا ایکٹ کی دفعہ 3 کے تحت کی، جس کا آغاز 7 اپریل 1916 میں رانچی سے ہوا اور اختتام یکم جنوری 1920ء کو ہوا۔ یعنی تقریباً 3 سال 9 ماہ عقوبت خانے میں گزارے، لیکن رہا ہوتے ہی پھر سابقہ روش پر چلنے لگے۔

دوسری گرفتاری: 10 دسمبر 1921ء کو ہوئی۔ 2 سال، 27 روز جیل کی سلاخوں کے پیچھے رہے۔

تیسری گرفتاری: نمک ستیہ گرہ 21 اگست 1930ء میرٹھ محبوس خانہ میں غالباً 6 ماہ اسیری میں کاٹے۔

چوتھی گرفتاری: 12 مارچ 1932ء رہائی 2 ماہ قید فرنگ میں گزارے

پانچویں گرفتاری: 3 جنوری 1940ء سزا غالباً 11 ماہ

چھٹی گرفتاری: 9 اگست 1942ء احمد نگر قلعہ سزا کی مدت 2 سال 10 مہینے 6 روز

دوران اسیری احمد نگر جیل مولانا کی زندگی میں ایک بہت بڑا سانحہ گزرا کہ ان کی اہلیہ داغ مفارقت دے گئیں۔ مولانا کو تاعمر جن کی یاد پژمردہ کرتی رہی۔ حکومت اہلکار ان کو عارضی ضمانت دینے پر آمادہ تھی مگر ان کی باوقار اور خوددار طبیعت نے یہ گوارا نہیں کیا۔

عموماً لوگ جیل خانہ میں قید تنہائی کو ایک اذیت سزا تصور کرتے ہیں مگر مولانا اس تنہائی کو تحفہ سمجھتے تھے۔ روش عام سے ہٹ کر چلنا ساری زندگی ان کا معمول رہا۔ خود ان کے الفاظ میں ’’ساری دنیا سے الٹی چال میرے حصہ میں آئی۔‘‘

ہمارے لیے یہ بات باعث شرم ہے اور احسان فراموشی ہے کہ این سی آر ٹی نے آزادی کے ’امرت مہوتسو‘ کے موقع پر گزشتہ سال ان کا سبق نصابی کتابوں سے حذف کر دیا۔ اس مذموم عمل کی جتنی مذمت کی جائے اتنی کم ہے۔