متھرا: مزدوروں کو لے جا رہی پک اَپ بجلی کے کھمبے سے ٹکرائی، 2 بچیوں سمیت 4 کی موت

متھرا میں جمعرات کو ایک سڑک حادثہ میں 4 لوگوں کی دردناک موت ہو گئی جبکہ 5 زخمی ہوئے ہیں۔ مرنے والوں میں 2 خواتین اور 2 بچیاں ہیں۔ یہ حادثہ تھانہ کوسی کلاں علاقے میں شیر گڑھ روڈ پر پیش آیا۔ مہلوکین بہار کے رہنے والے بتائے جاتے ہیں۔

اطلاع کے مطابق تقریباً 25 مزدور پک اَپ میں سوار ہو کر علی گڑھ سے متھرا کے کوسی کی طرف جا رہے تھے کہ صبح تقریباً 5 بجے ڈرائیور کو نیند آ گئی جس سے گاڑی بے قابو ہو کر بجلی کے کجھمبے سے ٹکرا گئی۔ حادثہ کے بعد گاڑی میں کرنٹ پھیلنے لگا جس سے لوگوں میں افرا تفری مچ گئی اور وہ کود کود کر بھاگنے لگے، تبھی ڈرائیور نے گاڑی بیک کر دی جس سے کئی لوگ اس کی زد میں آ کر کچل گئے۔

جانکاری کے مطابق اینٹ بھٹہ پر کام کرنے کے لیے بہار سے مزدور بلائے گئے تھے۔ یہ مزدور بہار کے گیا سے ٹرین کے ذریعہ علی گڑھ پہنچے اور پھر وہاں سے پک اَپ پر بیٹھ کر متھرا کے کوسی علاقہ واقع اینٹ بھٹہ پر جا رہے تھے۔ حادثہ کی اطلاع ملنے پر پولیس موقع پر پہنچی اور زخمیوں کو علاج کے لیے اسپتال میں داخل کرایا۔

حادثے میں بہار کے گیا ضلع باشندہ گوری دیوی (35 سال) اور ان کی بیٹی کومل، کنتی دیوی (30) اور ان کی بیٹی پرینکا (2) کی موقع پر ہی موت ہو گئی۔ وہیں کاجل، جیرا، مانا، گنگا اور ستیہ بُری طرح زخمی ہو گئے ہیں۔ سی او چھاتا آشیش شرما نے بتایا ہے کہ مہلوکین کی لاش کو پوسٹ مارٹم کرنے کے لیے بھیج دیا گیا ہے۔

اتر پردیش کے وزیر اعلیٰ یوگی آدتیہ ناتھ نے اس سڑک حادثہ پر غم کا اظہار کرتے ہوئے مہلوکین کے ورثا کے تئیں اظہار تعزیت کیا ہے۔ انہوں نے زخمیوں کے بہتر علاج کے لیے ضلع انتظامیہ کو ہدایت دی ہے اور افسران کو موقع پر پہنچ کر راحت و بچاؤ کام میں تیزی لانے کو کہا ہے۔