خطرناک ہوا بہار کا پانی! پٹنہ سمیت 31 اضلاع کا اندرون زمین پانی بے حد خراب

بہار میں بھلے ہی وزیر اعلیٰ نتیش کمار ’ہر گھر نل جل یوجنا‘ سے سبھی کو صاف پانی پلانے کا انتظام کرنے میں لگے ہوں، لیکن ریاست کی سچائی کچھ اور ہی ہے۔ دراصل بہار کا پانی جو وہاں کے باشندے پیتے ہیں وہ کسی دن ان کی جان بھی لے سکتا ہے۔ یہ دعویٰ بہار کے ریاستی معاشی سروے 22-2021 کی رپورٹ کر رہی ہے۔

اس رپورٹ میں بتایا گیا ہے کہ دیہی بہار کے بڑے حصے میں اندرون زمین پانی میں کیمیکل ملا ہوا ہے جو پینے لائق بالکل بھی نہیں ہے۔ رپورٹ کے مطابق یہ پانی بڑی آبادی کی صحت کے لیے انتہائی نقصاندہ ہے اور لگاتار اس پانی کو پینے والوں کے لیے کئی طرح کے خطرات کا اندیشہ ہے۔

جاری کردہ رپورٹ کے مطابق بہار کے 38 میں سے 31 اضلاع کے دیہی علاقوں میں اندرون زمین پانی میں آرسینک، فلورائیڈ اور آئرین کی بڑی مقدار موجود ہے جو صحت کے لیے مضر ہے۔ اس پانی کو پینے سے صحت کو بڑا خطرہ پیدا ہو سکتا ہے۔ قابل ذکر بات یہ ہے کہ جن اضلاع کا پانی پینے کے لیے ٹھیک نہیں ٹھہرایا گیا ہے ان میں راجدھانی پٹنہ بھی شامل ہے۔