مراٹھی کو کلاسیکی زبان کا درجہ، سنجے راؤت نے کہا 'اس کا کریڈٹ سبھی کو جاتا ہے کسی خاص شخص کو نہیں'

مرکزی کابینہ نے مراٹھی کو کلاسیکی زبان کا درجہ دینے کی منظوری دے دی ہے۔ اس سلسلے میں شیو سینا رہنما (ادھو گروپ) سنجے راؤت کا رد عمل سامنے آیا ہے۔ انہوں نے کہا کہ یہ بہت بڑا اعزاز ہے۔ مراٹھی کو کلاسیکی زبان کا درجہ دیا گیا ہے۔ 5 زبانوں کو اب تک یہ اعزاز دیا گیا ہے۔ بنگالی، مراٹھی، پالی، پراکرت اور اسمیا۔ کئی سال سے سے اس کا مطالبہ کیا جا رہا تھا کہ مراٹھی زبان کو یہ اعزاز دیا جانا چاہیے۔

 سنجے راؤت نے آگے کہا کہ ریاست کی تقریباً سبھی پارٹیوں کے رہنماؤں نے گزشتہ 35-30 برسوں سے، ہر وزیر اعلیٰ اور ہر ریاستی حکومت سے یہ مطالبہ کیا ہے۔ اگر ایسا ہوا ہے تو یہ سبھی کا تعاون ہے، صرف ایک شخص کا نہیں، بی جے پی کو ہر چیز کا کریڈٹ لینے کی عادت ہے۔ انہیں صنعت اور کاروبار اس ریاست سے باہر جانے سے روکنا چاہیے۔ مراٹھی زبان کے ساتھ ساتھ اس ریاست کا بھی وقار بڑھنا چاہیے۔

مرکزی وزیر داخلہ امت شاہ نے اس معاملے پر اپنے سوشل میڈیا پوسٹ پر لکھا ہے کہ مراٹھی نہ صرف خوشحال ادب تخلیق کرنے والی زبان ہے بلکہ اس نے ہمیں ہمیشہ ایک آزاد قوم کے طور پر رہنے کی ترغیب بھی دی ہے۔ وزیر اعظم نریندر مودی کا مراٹھی زبان کو کلاسیکی زبان کا درجہ دینے کا فیصلہ ہم سبھی کے لیے بے حد خوشی اور فخر کی بات ہے۔ اس موقع پر مراٹھی زبان بولنے والے بہنوں اور بھائیوں کو مبارک باد۔

مراٹھی زبان کو کلاسیکی زبان کا درجہ ملنے پر وزیر اعلیٰ ایکناتھ شندے نے بھی خوشی کا اظہار کیا ہے۔ انہوں نے 'ایکس' پر اپنے پوسٹ میں لکھا ہے کہ اس دنیا میں مراٹھی زبان کو میرا مانا جاتا ہے۔ شکریہ وزیر اعظم مودی۔ یہ وہ دن ہے جسے سنہرے حروف سے لکھا جانا چاہیے کہ میری مراٹھی نے کلاسیکی زبان کا درجہ حاصل کرلیا ہے۔ سبھی مراٹھی بولنے والوں کی طرف سے میں آپ کا تہہ دل سے شکریہ ادا کرتا ہوں۔ یہ آپ کی مضبوط حمایت کی وجہ سے ممکن ہو سکا۔

دوسری طرف مہاراشٹر کے نائب وزیر اعلیٰ دیوندر فڑنویس نے 'ایکس' پر لکھا کہ سبھی مراٹھی زبان بولنے والوں کو مبارک باد۔ وزیر اعظم نریندر مودی کی قیادت میں مرکزی کابینہ کے ذریعہ مراٹھی زبان کو کلاسیکی زبان کا درجہ دینے کے لیے بہت بہت مبارک باد۔