ملک کے باشندے میڈ اِن انڈیا کو ایک عوامی تحریک بنائیں: مودی

نئی دہلی: وزیر اعظم نریندر مودی نے 100 کروڑ کووڈ ویکسین کے حوالے سے ہندوستانی دیسی ویکسین پروگرام کی کامیابی کے ساتھ معاشی ترقی کی طرف اشارا کرتے ہوئے آج ملک کے باشندوں سے میڈاِن انڈیا کو ایک عوامی تحریک بنانے کی اپیل کی۔ میڈ ان انڈیا کو ایک عوامی تحریک بنائیں اور دیسی ساختہ اشیاء خریدنے کو اپنے معمول میں لائیں۔

جمعہ کی صبح قوم سے اپنے خطاب میں پی ایم مودی نے کہا کہ ویکسین کی بڑھتی ہوئی کوریج کے ساتھ، ہر شعبے میں مثبت سرگرمیاں تیز ہو رہی ہیں۔ آج چاروں طرف اعتماد، جوش اور امنگ کی فضا ہے۔ سو کروڑ ویکسین کے ساتھ، ہندوستان کو آج ایک زیادہ محفوظ ملک کے طور پر دیکھا جا رہا ہے۔

انہوں نے کہا کہ ماہرین اور اندرون اور بیرون ملک سے کئی ایجنسیاں ہندوستان کی معیشت کے بارے میں بہت مثبت ہیں۔ آج ہندوستانی کمپنیوں میں نہ صرف ریکارڈ سرمایہ کاری ہو رہی ہے بلکہ نوجوانوں کے لیے روزگار کے نئے مواقع بھی پیدا ہو رہے ہیں۔ اسٹارٹ اپس میں ریکارڈ سرمایہ کاری کے ساتھ، ریکارڈ اسٹارٹ اپس، یونیکارن بن رہے ہیں۔ اصلاحات کے ساتھ ساتھ ’گتی شکتی‘ اور ڈرون پالیسی بھی ہندوستان کی معیشت کو فروغ دینے والی ہے۔ زراعت کے شعبے نے کورونا کے دور میں ہماری معیشت کو مضبوطی سے سنبھالے رکھا۔ آج، ریکارڈ سطح پر اناج کی خریداری کی جا رہی ہے۔ رقم براہ راست کسانوں کے بینک اکاؤنٹ میں جا رہی ہے۔

پی ایم مودی نے کہا کہ ’پچھلی دیوالی میں ہر کسی کے ذہن میں ایک تناؤ تھا لیکن یہ دیوالی 100 کروڑ ویکسین کی خوراک کی وجہ سے پیدا ہونے والا ایک یقین ہے۔ اگر میرے ملک کی ویکسین مجھے تحفظ فراہم کر سکتی ہے تو میرے ملک میں تیار کردہ سامان میری دیوالی کو مزید شاندار بنا سکتے ہیں‘۔