مہاراشٹر: ویرار کے اسپتال میں آگ لگنے کا واقعہ، کورونا کے 13 مریضوں کی موت

ممبئی: کورونا سے لگاتار ہو رہی اموات کے درمیان مہاراشٹر میں ایک اور اندوہناک واقعہ پیش آیا ہے۔ ممبئی سے ملحقہ ویرار کے وجے ولبھ اسپتال میں آگ لگنے کا کے سبب کورونا کے 13 لقمہ اجل بن گئے۔ این ڈی ٹی وی کی رپورٹ کے مطابق آگ جمعرات کو دیر رات ئے لگی جس کے سبب اسپتال میں مریضوں اور طبی عملہ میں خوف و ہراس پھیل گیا۔ اپستال کے سی ای او دلیپ شاہ نے صحافیوں کو بتایا کہ واقعہ کے وقت استپال میں تقریباً 90 مریض داخل تھے۔

واقعہ کے ایک عینی شاہد نے صحافیوں کو بتایا، ’’مجھے رات کو تین بجے کے قریب ایک دوست نے کال کی۔ ان کی ساس اس اسپتال میں داخل تھیں۔ جب میں یہاں پہنچا تو اسپتال کے باہر فائر بریگیڈ کی گاڑیاں کھڑی تھیں۔ دوسرے فلور پر واقع آئی سی یو دھوئیں سے بھرا ہوا تھا۔ وہاں بس دو نرسیں تھیں، کوئی ڈاکٹر نظر نہیں آیا۔ فائر بریگیڈ کے ملازمین آگ بجھاتے ہوئے نظر آئے اور انہوں نے آدھا گھنٹا میں آگ پر قابو پا لیا۔ ہمیں وہاں 8-10 لاشیں نظر آئیں۔‘‘

ادھر دلیپ شاہ نے ان دعووں کو خارج کیا ہے کہ واقعہ کے وقت اسپتال میں کوئی ڈاکٹر نہیں تھا۔ انہوں نے کہا کہ ڈاکٹر وہاں موجود تھے۔ انہوں نے اس بات پر بھی زور دیا کہ اسپتال حفاظت کے تمام اصولوں کی پاسداری کرتا ہے۔ واقعہ کے بعد کئی مریضوں کو دوسرے اسپتالوں میں منتقل کیا گیا ہے۔

مہاراشٹر میں یہ واقعہ ایسے وقت میں پیش آیا ہے جب یہاں کورونا وائرس نے سب سے زیادہ تباہی مچائی ہوئی ہے اور فعال کیسز کی تعداد میں تیزی سے اضافہ ہو رہا ہے۔ مہاراشٹر میں بدھ کے روز بھی ایسا ہی دردناک واقعہ پیش آیا تھا، جس کے دوران ناسک میں ایک اسپتال کے باہر آکسیجن ٹینکر کے لیک ہو جانے سے 24 مریضوں کی موت ہو گئی تھی۔