می ٹو مہم: ایم جے اکبر نے پریا رمانی کے خلاف 97 وکیلوں کی فوج اتاری

مودی حکومت میں وزیر مملکت برائے خارجہ ایم جے اکبر نے ’می ٹو‘ کے تحت لگے الزامات پر صفائی دینے کے لیے اب قانونی راستہ اختیار کیا ہے۔ انھوں نے جنسی استحصال کے الزام لگانے والی ایک صحافی پریا رمانی پر دہلی کی پٹیالہ ہاؤس کورٹ میں مجرمانہ ہتک عزتی کا کیس کیا ہے۔ کیس کے لیے اکبر نے دہلی لاء فرم کرنجوالا اینڈ کمپنی کی خدمات لی ہیں۔ فرم نے عدالت میں جو وکالت نامہ داخل کیا ہے اس میں اکبر کا کیس لڑنے کے لیے 97 وکیلوں کے نام دیے گئے ہیں۔

صحافی پریا رمانی کے خلاف وکیلوں کی فوج اتارے جانے پر سوشل میڈیا میں گہما گہمی دیکھنے کو مل رہی ہے۔ صحافی آدتیہ راج کول نے اسے الزام لگانے والی صحافی پر دباؤ بنانے کا طریقہ قرار دیا ہے۔

سہاسنی حیدر کا اس سلسلے میں کہنا ہے کہ ’’سلطنت نے جوابی حملہ کیا ہے۔ اور اس حملے میں وزیر اعظم اور ان کی پوری کابینہ کی مدد شامل ہے، اور سب سے بڑی لاء فرم کیس لڑے گی۔ 2 لڑکیوں سمیت 14 خواتین کے خلاف سلطنت کا ساتھ کچھ سینئر کالم نویس بھی دے رہے ہیں۔ لگتا ہے ہم سب پر مقدمہ ہے۔‘‘

اس پورے معاملے پر سینئر صحافی مرنال پانڈے نے اپنا رد عمل ظاہر کرتے ہوئے لکھا ہے کہ ’’می ٹو مہم کا پوری دنیا میں یہ اپنی طرح کا پہلا معاملہ ہے۔‘‘

ایک دیگر ٹوئٹر یوزر نے لکھا ہے کہ اب جب کہ ایم جے اکبر نے پریا رمانی پر مقدمہ دائر کر دیا ہے تو وزارت برائے خواتین و اطفال کی ذمہ داری ہے کہ وہ می ٹو مہم کو مالی اور قانونی مدد کرے۔ جن لوگوں نے ایسے اثردار لوگوں کے خلاف آواز اٹھانے کی ہمت کی ہے کسی سیاسی دباؤ میں ان کی آواز دبنی نہیں چاہیے۔