بھیڑ نے بھگوان رام کے نام کو ’قتل کی چیخ‘ میں بدل دیا: نصرت جہاں

نفرت پر مبنی جرائم میں بے تحاشہ اضافہ پر کئی لوگ فکرمند ہیں۔ اس مسئلہ پر ترنمول کانگریس رکن پارلیمنٹ نصرت جہاں نے بھی اپنا نظریہ سامنے رکھا۔ موب لنچنگ اور نفرت آمیز تشدد سے متعلق 49 دانشوروں کے ذریعہ وزیر اعظم نریندر مودی کو لکھے گئے کھلے خط کی تعریف کرتے ہوئے نصرت جہاں نے کہا کہ اقلیتی طبقہ ’بھیڑ‘ کے خوفناک عمل کا سامنا کر رہا ہے۔

دراصل میڈیا میں نصرت جہاں کے ایک خط کا حوالہ پیش کرتے ہوئے موب لنچنگ جیسے کرائم پر ان کا نظریہ بیان کیا جا رہا ہے۔ اس کے مطابق نصرت جہاں نے کہا ہے کہ ’’ملک میں نفرت پر مبنی جرائم اور بھیڑ کے ذریعہ قتل کے واقعات میں زبردست اضافہ ہوا ہے۔ سال 2014 سے 2019 کی مدت میں مسلمانوں، دلتوں اور اقلیتوں کے خلاف سب سے زیادہ نفرت پر مبنی جرائم ہوئے ہیں۔ سال 2019 میں ہی 11 سے بھی زیادہ نفرت کے جرائم ہو چکے ہیں اور چار لوگ مار جا چکے ہیں اور وہ سبھی اقلیتی طبقہ سے اور دبے کچلے لوگ تھے۔‘‘

مغربی بنگال سے رکن پارلیمنٹ نصرت جہاں نے دعویٰ کیا کہ ملک بھر میں ایسے واقعات ہوئے ہیں جہاں گئو رکشکوں نے گائے کا گوشت کھانے اور مویشی کی اسمگلنگ کو لے کر افواہ کی وجہ سے لوگوں پر حملہ کیا ہے۔ انھوں نے قتل کے واقعات کے متاثرین کا تذکرہ کرتے ہوئے کہا کہ ’’اس سلسلے میں حکومت کی سوچی سمجھی خاموشی اور کوئی رد عمل نہ دینا ہمیں بری طرح متاثر کرتا ہے۔ ہمارے ملک میں ناانصافی کے کئی نام ہیں جن میں تبریز انصاری، محمد اخلاق اور پہلو خان شامل ہیں۔‘‘

دراصل چار سال پہلے پرتشدد بھیڑ نے اتر پردیش کے دادری میں گئو کشی کے شبہ میں 52 سالہ محمد اخلاق کا قتل کر دیا تھا جب کہ پہلو خان کا قتل دہلی-الور شاہراہ پر مویشی لے جانے کے دوران یکم اپریل 2017 کو گئو رکشکوں نے پیٹ پیٹ کر دیا تھا۔ تبریز انصاری کا قتل تو اسی سال جھارکھنڈ میں پرتشدد بھیڑ کیا۔ بھیڑ اس سے ’جے شری رام‘ کا نعرہ لگانے کے لیے کہہ رہی تھی۔ مغربی بنگال کے بشیر ہاٹ سے رکن پارلیمنٹ نصرت جہاں کا کہنا ہے کہ ’جے شری رام‘ کا نعرہ اب باعث فکر بن گیا ہے۔ انھوں نے خط میں لکھا ہے کہ ’’تشدد پر آمادہ بھیڑ نے دراصل بھگوان رام کے نام کو قتل کی چیخ میں بدل دیا ہے۔ موب لنچنگ کے جرائم میں ملوث افراد ہمارے ملک کے دشمن ہیں اور کچھ نہیں۔‘‘