لکھنؤ: آن لائن گیم کھیلنے کے عادی طالب علم کی خودکشی

لکھنؤ: اتر پردیش کی راجدھانی میں 12ویں جماعت کے ایک طالب علم نے اپنے والدین کو پیغام بھیجنے کے بعد مبینہ طور پر خودکشی کر لی۔ کانونٹ اسکول کے 19 سالہ طالب علم محمد دانیال نے منگل کو پھانسی لگا لی۔ اسے کنگ جارج میڈیکل یونیورسٹی (کے جی ایم یو) کے ٹراما سینٹر لے جایا گیا لیکن ڈاکٹروں نے اسے مردہ قرار دے دیا۔

طالب علم نے اپنے پیغام میں پشیمانی کا اظہار کرتے ہوئے اپنے والدین سے معافی مانگی ہے۔ دانیال کے چچا کا کہنا تھا کہ اسے آن لائن گیمنگ کی لت کی وجہ سے اتنا سخت قدم اٹھانا پڑا۔ چوک پولیس اسٹیشن کے انچارج ناگیش اپادھیائے نے بتایا کہ دانیال کو منگل کو انگریزی ادب کے انٹرمیڈیٹ امتحان میں بیٹھنا تھا۔ تعلیمی دباؤ نے بھی اس کے تناؤ میں اضافہ کیا ہوگا۔

دانیال نے پیغام میں مزید لکھا کہ وہ کسی خوف یا کسی کی وجہ سے اپنی زندگی ختم نہیں کر رہا۔ اس نے رونے والی ایموجی کا استعمال کرتے ہوئے پیغام میں لکھا، ’’میں نے ایسی غلطیاں کی ہیں جن کو ٹھیک نہیں کیا جا سکتا اور اسی لیے میں اپنی زندگی ختم کر رہا ہوں۔‘‘