’لون ڈیفالٹر کے ہر معاملے میں لُک آؤٹ سرکلر کا سہارا نہیں لیا جا سکتا‘، دہلی ہائی کورٹ کا سخت تبصرہ

قرض کی وصولی کے لیے لُک آؤٹ سرکلر جاری کرنے کے معاملے پر دہلی ہائی کورٹ نے آج سخت تبصرہ کیا ہے۔ ہائی کورٹ نے کہا کہ اگر دھوکہ دہی یا فنڈز کے غلط استعمال کا کوئی الزام نہیں ہے تو بینک قرض وصولی کے لیے لُک آؤٹ سرکلر جاری نہیں کر سکتے۔ عدالت نے ایک کمپنی کے سابق ڈائریکٹر کے خلاف جاری کردہ لُک آؤٹ سرکلر (ایل او سی) کو منسوخ کر دیا جو قرض کی ادائیگی میں ناکام رہی اور جس کا وہ گارنٹر (ضامن) تھا۔

ہائی کورٹ نے زور دے کر کہا کہ بیرون ملک سفر کرنے والوں کے لیے ایل او سی ایک بڑی رکاوٹ ہے۔ کسی شخص کو بہت مجبور کرنے والی وجوہات کے علاوہ بیرون ملک جانے کے اس کے حق سے محروم نہیں کیا جا سکتا۔ عدالت نے کہا کہ درخواست گزار کے خلاف کوئی فوجداری کارروائی زیر التوا نہیں ہے اور نہ ہی اس پر قرض کی رقم کے غبن میں ملوث ہونے کا کوئی الزام ہے۔ بینک نے کہا کہ اس نے پہلے ہی اس کے ساتھ کمپنی کے خلاف SARFAESI قانون اور دیوالیہ پن جیسے مختلف قوانین کے تحت اقدامات کیے ہیں۔ درخواست گزار اس وقت یونین بینک کا ڈائریکٹر تھا جس نے 69 کروڑ روپے کے قرض کی ضمانت لی تھی۔

کمپنی کے ذریعے قرض کی ادائیگی میں ناکامی کے بعد بینک نے مختلف قوانین کے تحت کارروائی شروع کی اور درخواست گزار کے خلاف لُک آؤٹ سرکلر جاری کرنے کی بھی درخواست کی۔ سیکشن 21 کا حوالہ دیتے ہوئے عدالت نے کہا کہ کسی بھی شخص کو بیرون ملک سفر کے حق کی گارنٹی دی گئی ہے اور اسے منمانے یا غیر قانونی طریقے سے نہیں چھینا جا سکتا۔

واضح رہے کہ اس معاملے گزشتہ ماہ بھی سماعت ہوئی تھی۔ جسٹس سبرامنیم پرساد نے 28 مئی کو سنائے گئے اپنے فیصلے میں کہا تھا کہ عدالت کی رائے ہے کہ قانون میں دستیاب تمام متبادل کو بروئے کار لانے کے بعد بینک کسی ایسے شخص سے قرض کی وصولی کے لیے لک آؤٹ سرکلر نہیں کھول سکتا جو ادائیگی سے قاصر ہے، جبکہ اس پر ایسا کوئی الزام نہیں ہے کہ وہ کسی فراڈ میں ملوث تھا یا قرض کے طور پر دی گئی رقم میں غبن کر رہا تھا۔