دہلی کی سات سیٹوں کے لئے پولنگ شروع

نئی دہلی: دہلی کی سات لوک سبھا سیٹوں کے لئے سخت سکیورٹی انتظامات کے درمیان اتوار کی صبح سات بجے پولنگ شروع ہو گئی جو شام چھ بجے تک جاری رہے گی۔

دہلی کے 7.8 کروڑ مرد اور 6.4 خواتین ووٹر اپنے حق رائے دہی کے ذریعے 164 امیدواروں کی قسمت کا فیصلہ کریں گے۔ چاندنی چوک، مشرقی دہلی، نئی دہلی، شمال مشرق دہلی، شمال مغربی دہلی ، جنوبی دہلی اور مغربی دہلی لوک سبھا سیٹوں پر ووٹنگ کے لئے 13،800 پولنگ مراکز بنائے گئے ہیں۔

مختلف مقامات پر پولنگ شروع ہونے سے پہلے ہی پولنگ مراکز پر ووٹروں کی قطاریں لگنی شروع ہو گئی۔ دہلی میٹرو ریل کارپوریشن (ڈی ایم آر سی) نے انتخابی ڈیوٹی میں تعینات ملازمین کو ان کے متعلقہ پولنگ مراکز تک پہنچنے کی سہولت کے لئے تمام لائنوں پر صبح چار بجے سے ہی اپنی خدمات شروع کر دی تھی۔

دہلی کی ساتوں سیٹوں پر سہ رخی مقابلہ ہے۔ دہلی میں آج جن اہم شخصیات کی قسمت الیکٹرانک ووٹنگ مشین (ای وی ایم) میں بند ہو جائے گئی ، ان میں تین مرتبہ دہلی کی وزیر اعلی رہی شیلا دیکشت، کانگریس کے چار مرتبہ رکن پارلیمنٹ منتخب ہوئے جے پرکاش اگروال، بھارتیہ جنتا پارٹی (بی جے پی) کے سینئر لیڈر اور مرکزی وزیر ہرش وردھن، بی جے پی لیڈرمنوج تیواری،میناکشی لیکھی اور رمیش ودھوڑي اور سابق مرکزی وزیر اجے ماکن شامل ہیں۔

پہلی مرتبہ انتخابی میدان میں اترنے والوں میں سابق باکسر اور اولمپین وجیندر سنگھ (کانگریس)، راگھو چڈھا (عام آدمی پارٹی)، سابق کرکٹر گوتم گمبھیر (بی جے پی) اور صوفی گلوکار ہنس راج ہنس (بی جے پی) سے ہیں۔