لوک سبھا انتخابات: سماجوادی پارٹی نے جاری کیا انتخابی منشور، عوام سے کئے متعدد وعدے

لکھنؤ: سماجوادی پارٹی نے آئندہ لوک سبھا انتخابات کے لیے بدھ کو اپنا انتخابی منشور جاری کر دیا۔ اس دستاویز میں ذات پر مبنی مردم شماری اور کسانوں کو کم از کم امدادی قیمت کی قانونی گارنٹی سمیت متعدد وعدے کئے گئے ہیں۔ سماجوادی پارٹی کے سربراہ اکھلیش یادو اور پارٹی کے کئی دیگر سینئر لیڈران نے لکھنؤ میں واقع پارٹی کے ریاستی دفتر میں انتخابی منشور جاری کیا۔

انڈین نیشنل ڈیولپمنٹ انکوزیو الائنز (انڈیا) کی اہم حلیف جماعت سماجوادی پارٹی کے انتخابی منشور ’جنتا کا مانگ پتر، ہمارا ادھیکار میں ’انڈیا‘ اتحاد کی حکومت قائم ہونے پر ذات پر مبنی مردم شماری کرائے جانے، سماجی انصاف، کسانوں کی بہبود، نوجوانوں کی بہبود، آٹا اور ڈیٹا کا حق، تعلیم و صحت اور خواتین کی بااختیاری کے مختلف نکات پر متعدد وعدے کئے گئے ہیں۔

اس موقع پر اکھلیش یادو نے کہا، ’’اس جنتا کے مانگ پتر میں سب سے پہلے آئین کی حفاظت کا حق ہے، میڈیا کی آزادی کا حق، جمہوری اداروں کی آزادی کا حق ہے۔ انصاف، مساوات، سماجی انصاف کا حق ہے۔ اس ملک کی ترقی محور ذات پر مبنی مردم شماری ہے، جو ضروری ہے۔ روٹی کا حق، مہنگائی سے نجات کا حق، غریبی سے باہر نکالنے کا حق ضروری ہے۔‘‘

انہوں نے مزید کہا، ’’سماجوادی پارٹی کا خیال ہے کہ کسانوں کو ایم ایس پی دیا جائے۔ بغیر ایم یس پی کے ان کی حالت میں بہتری ممکن نہیں۔ اس کے لیے قانونی طور پر گارنٹی کے طور پر ایم ایس پی دلانے کا کام سماجوادی پارٹی کرے گی۔

سماجوادی پارٹی انڈیا اتحاد کے تحت اتر پردیش کی 80 میں سے 62 سیٹوں پر انتخاب لڑ رہی ہے، جبکہ کانگریس 17 سیٹوں پر میدان میں ہے۔ اس کے علاوہ بھدوہی لوک سبھا سیٹ ٹی ایم سی (ترنمول کانگریس) کو دی گئی ہے۔