علی اور بجرنگ بلی کے نام پر منافرت پیدا کرنے کی کوشش: مایاوتی

لکھنؤ: لوک سبھا انتخابات کے دوران فرقہ پرست قوتوں کی ہر چند کوشش ہے کہ وہ ہندو مسلمان کے درمیان کھائی پیدا کر کے اپنے ووٹوں کی فصل کو کاٹ لیں۔ ملک کے وزیر اعظم نریندر مودی اور اتر پردیش کے وزیر اعلیٰ یوگی آدتیہ ناتھ بھی اس کام میں پیچھے نہیں ہیں۔ یوگی آدتیہ ناتھ نے حال ہی میں ’علی‘ اور بجرنگ بلی پر بیان دے کر نفرت پھیلانے کی کوشش کی تھی۔ جس پر رد عمل آنے کا سلسلہ جاری ہے۔

یوگی آدتیہ ناتھ کے بیان پر اعظم خان کے بعد اب مایاوتی نے بھی حملہ بولا ہے۔ بی ایس پی سربراہ مایاوتی نے رام نومی کے موقع پر لوگوں کو مبارک باد پیش کرتے ہوئے کہا کہ ایک طرف جہاں لوگ رام کے اخلاقیات اور اقدار کو یاد کر رہے ہیں وہیں کچھ لوگ ایسے بھی ہیں جو انتخابی فائدہ کے لئے سماج میں ٹکراؤ پیدا کرنے کی کوشش کر رہے ہیں۔

قابل ذکر ہے کہ اترپردیش کے وزیر اعلی یوگی آدتیہ ناتھ نے 9 اپریل کو اپنے بیان میں کہا تھا کہ موجودہ الیکشن ’بجرنگ بلی‘ اور ’علی‘ کے درمیان ہو رہا ہے۔

بی ایس پی سپریمو مایاوتی نے اپنے ٹوئٹ میں کہا، رام نومی کی ملک اور ریاست کے باشندگان کو مبارک باد۔ دعا ہے کہ سبھی کی زندگی میں سکھ اور سکون آئے۔ ایسے موقع پر جب کچھ لوگ رام کی اقدار کو یاد کر رہے ہیں ایسے میں انتخابی فائدہ کے لئے بجرنگ بلی اور علی کے نام پر تنازعہ پیدا کرنے والی بر سر اقتدار حکومت سے محتاط رہنے کی ضرورت ہے۔‘‘

الیکشن کمیشن نے یوگی آدتیہ کے بیان کو مثالی ضابطہ اخلاق کی خلاف ورزی قرار دیا ہے۔ کمیشن نے ان کے اس بیان پر وجہ بتاؤ نوٹس جاری کیا تھا۔

وزیر اعلیٰ یوگی آدتیہ ناتھ نے اپنا جواب لکھنؤ میں چیف الیکشن افسر کو سونپ دیا ہے، اپنے جواب میں انہوں نے کہا کہ ان کی منشا غلط نہیں تھی اور مستقبل میں اس طرح کے بیان نہیں دیں گے۔