دہلی میں لاک ڈاؤں بڑھایا نہیں جائے گا: ستیندر جین

نئی دہلی: دہلی میں کورونا وائرس کے ریکارڈ معاملوں اور اموات کے پیش نظر ایک پھر سختی سے لاک ڈاؤن نافذ کئے جانے کی قیاس آرائیوں کو مسترد کرتے ہوئے وزیر صحت ستیندر جین نے جمعہ کے روز کہا کہ راجدھانی مین لاک ڈاؤن میں اضافہ نہیں کیا جائے گا۔

جین نے آج میڈیا کے ایک سوال پر کہ کیا دہلی میں لاک ڈاؤن بڑھانے پر غور ہوا ہے، انہوں نے کہا کہ ’’نہیں دہلی میں لاک ڈاؤن نہیں بڑھایا جائے گا‘‘۔

بھارتیہ جنتاپارٹی (بی جے پی) کے زیر انتظام علاقہ دہلی کی تینوں کارپوریشنوں کے لیڈروں نے جمعرات کو اس دعوے پر کہ راجدھانی میں شمشان گھاٹوں پر 2098 کورونا متاثرین کی آخری رسوم ادا کی جاچکی ہیں، مسٹر جین نے کہا ’’وہ یہ ساری تفصیلات ہمارے پاس کیوں نہیں بھیج رہے ہیں؟ وہ مہلوکین کے نام، عمر اور رپورٹ ہمیں دیں، سبھی تفصیلات کی ضرورت ہے‘‘۔

انہوں نے کہا کہ بی جے پی کے جو لیڈر دعوی کررہے ہیں ، ان سے 2098 اموات میں کورونا کی تصدیق کی رپورٹ سمیت پوری فہرست کے بارے میں جانکاری مانگنی چاہیے۔

راجدھانی میں ماہ جون میں 11 تاریخ تک روزانہ ایک ہزار یا اس سے زیادہ کورونا کے معاملے سامنے آرہے ہیں۔ جمعرات کو انفیکشن کے ریکارڈ 1877 معاملے آئے اور کل تعداد 34687 پر پہنچ گئی ہے۔ ملک میں انفیکشن کے معاملے میں تیسرے مقام رہنے والی دہلی میں کورونا سے 1085 اموات ہوچکی ہیں۔

کورونا کے مسلسل بڑھتے قہر کے پیش نظر دہلی میں ایک بار پھر سختی سے لاک ڈاؤن نافذ کرنے کی قیاس آرائیاں زوروں پر ہیں۔ جمعرات کو دہلی ہائی کورٹ میں مفاد عامہ کی ایک عرضی داخل کرکے دہلی میں پھر سے سختی کے ساتھ لاک ڈاؤن کی درخواست کی گئی اگرچہ ہائی کورٹ نے آج دہلی میں 30 جون تک لاک ڈاؤن بڑھانے والی مفاد عامہ کی اس درخواست کو مسترد کردیا ہے۔