دہلی میں لاک ڈاؤن شروع،کون سی ضروری چیزیں کرنے کی اجازت

کورونا وائرس سے خطرے کے پیش نظر قومی راجدھانی دہلی میں لاک ڈاؤن شروع ہوگیا ہے ۔اتوار کے روز وزیر اعظم نریندر مودی کی اپیل پر ملک بھر میں ایک دن کے لئے جنتا کرفیو نافذ رہا اور اس دوران تمام سڑکیں خالی نظر آئیں جبکہ دکانیں، اور دیگر کاروبای ادارے پوری طرح بند رہے۔ جنتا کرفیو کے دوران دہلی میٹرو کی خدمات 31 مارچ تک معطل رکھنے کا فیصلہ کیا گیا جبکہ شام 6 بجے کے بعد اروند کیجریوال نے دہلی کے ایل جی انل بیجل کے ساتھ میٹنگ کرنے کے بعد دہلی میں لاک ڈاؤن کا اعلان کر دیاتھا۔

لاک ڈاؤن کے دوران پبلک ٹرانسپورٹ بند رہے گا اور صرف 25 فیصد ڈی ٹی سی بسیں چلیں گی، یہ بسیں بھی ضروری خدمات انجام دینے والے افراد کے لئے ہی چلائی جائیں گی۔اس دوران ریاست کی تمام عبادت گاہیں بند رہیں گی۔دہلی کی دکانیں اور بازار سب بند رہیں گے۔ دہلی کی سرحدیں سیل رہیں گی، تاہم دوسری ریاستوں سے کھانا اور سبزی لانے والی گاڑیوں کو دہلی آنے کی اجازت رہے گی۔ اس کے علاوہ تمام پروازیں معطل رہیں گی لیکن اسپتال اور محکمہ بجلی کے دفاتر کھلے رہیں گے۔

دہلی کے وزیر اعلی اروند کیجریوال نے کہا ’’کورونا کے مریضوں کی تعداد بڑھتی جا رہی ہے۔ ہم نہیں چاہتے کہ یہ انفیکشن تیسرے مرحلے تک پہنچ جائے اور اموات کی تعداد میں بہت زیادہ اضافہ ہو جائے اور ہم خود کو کبھی معاف نہ کر پائیں۔

لاک ڈاؤن کا مطلب ہے کہ پبلک ٹرانسپورٹ خدمات بند رہے گی۔ یہ پابندی نجی بسوں، ٹیکسی، رکشہ اور ای رکشہ سب پر عائد رہے گی۔ لاک ڈاؤن کے دوران دہلی کی دکانیں، بازار، دفاتر، گودام، ہفتہ وار بازار اور دیگر تمام ادارے بند رہیں گے۔ اس دوران دہلی میں ہر طرح کا تعمیراتی کام بھی بند رہے گا۔ اس کے علاوہ نجی دفاتر بھی بند رہیں گے۔

لاک ڈاؤن کے دوران یہ ضروری خدمات جاری رہیں گی

ریستوراں سے ٹیک ا وے (کھانا پیک کراکر لے جانا) اور ہوم ڈلیوری جاری رہے گی۔ دریں اثنا، ٹیلی کام، سبزیاں، راشن، میڈیکل اسٹور سمیت ضرورت کی دکانیں کھلی رہیں گی۔

قانون نافذ کرنے والے ادارے اور مجسٹریٹوں کے تمام دفاتر کھلے رہیں گے۔ پولیس کا کام جاری رہے گا۔ تمام اسپتال، فائر بریگیڈ کی خدمات جاری رہیں گی۔ بجلی کے دفاتر میں کام جاری رہے گا۔ پانی کی فراہمی سے متعلق تمام محکموں میں کام جاری رہے گا۔ دہلی اسمبلی کا ایک روزہ بجٹ اجلاس ہوگا۔ پرنٹ اور الیکٹرانک میڈیا کا کام جاری رہے گا۔ بینکوں کے کیش کاؤنٹر کھلے رہیں گے تاکہ لوگ اپنا پیسہ نکال سکیں۔ اس کے علاوہ انٹرنیٹ اور براڈبینڈ سروس بھی جاری رہے گی-