شوپیاں میں کشمیری پنڈت کی آخری رسومات انجام دینے میں مقامی مسلمان رہے پیش پیش

سری نگر: جنوبی کشمیر کے ضلع شوپیاں میں مقامی مسلمانوں نے ایک بار پھر مذہبی ہم آہنگی، اتحاد، انسانیت نوازی اور کشمیریت کی عمدہ مثال قائم کی ہے جہاں وہ ایک معمر کشمیری پنڈت کی آخری رسومات انجام دینے میں پیش پیش رہے۔ آخری رسومات میں درجنوں مرد و زن نے شرکت کی اور نم آنکھوں سے آنجہانی پنڈت کو رخصت کیا۔

موصولہ اطلاعات کے مطابق ضلع شوپیاں کے زینہ پورہ کا یہ واحد پنڈت خاندان اُن سینکڑوں کشمیری پنڈت خاندانوں میں ایک ہے جو گزشتہ تین دہائیوں کے نامساعد حالات کے دوران بھی کشمیر میں ہی مقیم رہے اور اپنے ہمسایہ مسلم برادری کے دُکھ سُکھ میں شامل حال رہے۔ جمعرات کی صبح جب اس خاندان کے سرپرست پنڈت کانت رام کا انتقال ہوا، تو اس گاؤں کے درجنوں مسلمان اُن کی آخری رسومات انجام دینے میں پیش پیش رہے۔

مقامی لوگوں نے بتایا کہ جمعرات کی صبح جب معمر پنڈت کانت رام کے انتقال کرجانے کی خبر گاؤں میں پھیلی تو درجنوں کی تعداد میں مرد، زن، بچے اور بوڑھے ان کے گھر پر پہنچ گئے۔ مقامی مسلمانوں نے نہ صرف اپنے پنڈت بھائیوں کے شانہ بشانہ آنجہانی کی آخری رسومات سرانجام دیں بلکہ اُن کی ارتھی کو بھی اپنے کندھوں پر اٹھانے کے علاوہ چتا کو آگ لگانے کے لئے درکار لکڑی اور دوسری چیزیں مہیا کیں۔

آنجہانی کانت رام کے ایک مسلم پڑوسی نے کہا کہ ہم ہمیشہ سے ایک دوسرے کے دُکھ سکھ میں برابر شریک رہے ہیں۔ ان کا کہنا تھا کہ 'ہم مل جل کر رہتے آئے ہیں۔ ایک دوسرے کے پاس آتے رہتے ہیں۔ خاص طور پر خوشی اور غم کے موقع پر ایک دوسرے کا ساتھ نہیں چھوڑتے ہیں۔ ہم کام بھی مل کر ہی کرتے ہیں'۔ ان کے پسماندگان میں ایک فرزند رمیش کمار، جو پیشے سے ڈاکٹر ہیں، اور چار بیٹیاں ہیں۔ ڈاکٹر رمیش کا شوپیاں میں ہی اپنا کلینک ہے۔

یہاں یہ بات قابل ذکر ہے کہ کشمیر میں سال 1990 میں مسلح شورش شروع ہونے کے ساتھ ہزاروں پنڈت اپنے گھر چھوڑ کر ہندوستان کے مختلف حصوں میں مقیم ہوگئے۔ تاہم سینکڑوں کنبوں نے ہجرت نہیں کی اور یہیں مقیم رہے۔