پدماوت LIVE: قانون کی ابتر صورت حال کیلئے بی جے پی حکومتیں ذمہ دار۔ کانگریس

آج بالآخر ’پدماوت‘ دیکھنے والوں کا انتظار ختم ہو گیا۔ اشتعال انگیز بیانات، تشدد، توڑ پھوڑ اور ہنگامہ آرائیوں کے درمیان پورے ملک میں ’پدماوت‘ ریلیز ہوئی لیکن چار ریاستوں میں اس فلم کو نہیں دکھائے جانے کا فیصلہ کیا گیا۔ گجرات، راجستھان، مدھیہ پردیش اور گوا میں یہ فلم نہیں دکھائی جا رہی ہے۔ گجرات میں تین ملٹی پلیکس کے باہر ہوئے تشدد کے واقعات کو دیکھتے ہوئے تھیٹر مالکوں نے کہا کہ وہ فلم ’پدماوت‘ کو نہیں دکھائیں گے۔

دہلی کے راجوری گارڈن واقع تھیٹر میں فلم ‘پدماوت’ دیکھنے کے لیے پہلے شو میں لوگوں کی بڑی تعداد پہنچی۔ فلم دیکھنے پہنچے شائقین کا کہنا ہے کہ وہ دیکھنا چاہتے ہیں کہ آخر اس فلم میں ایسا کیا ہے جس پر پورے ملک میں اس قدر ہنگامہ برپا ہو رہا ہے۔

آج صبح دہلی کے اسکول میں تعلیم حاصل کرنے والے بچوں کو اسکول چھوڑنے ان کے والدین خود آئے کیونکہ وہ اس بات سے پریشان تھے کہ گڑگاوں میں اسکولی بس پر حملہ ہو سکتا ہے تو دہلی میں بھی اس طرح کا واقعہ ہو سکتا ہے۔

گروگرام یعنی گڑگاوں واقع ایک مال میں اس فلم کی اسکریننگ رد کر دی گئی اور اس کا پوسٹر باہر لگا دیا گیا تاکہ کرنی سینا کے مشتعل کارکنان کسی طرح کی توڑ پھوڑ نہ کریں۔

دوسری طرف پونے میں فلم پدماوت خوشگوار ماحول میں دیکھا جا رہا ہے۔ ای اسکوائر سنیما ہال کے مالک کشور کہتے ہیں کہ صبح والا شو ہاوس فل ہے اور پولس کی موجودگی کے ساتھ ساتھ یہاں ہماری سیکورٹی بھی ہے۔ ان کا کہنا ہے کہ اب تک سب کچھ ٹھیک ہے۔

بہار کے مظفر پور میں کرنی سینا کے کارکنان فلم کی مخالفت میں سڑک پر اترے۔ ان کے ہاتھوں میں تلوار تھے اور لوگوں نے اپنے چہرے کو کپڑوں سے ڈھکا ہوا ہے۔ فلم کی مخالفت کر رہے کرنی سینا کارکنان نے ٹائر میں آگ لگا کر علاقے میں کرفیو کا سماں پیدا کر دیا ہے۔

راجستھان میں بھی کرنی سینا کے غنڈے مخالفت میں بائک ریلی نکالی اور پورے ملک میں فلم ریلیز کے خلاف احتجاج کیا۔

ملک کی 75 فیصد ملٹی پلیکس مالکان کی نمائندگی کرنے والے ادارہ ملٹی پلیکس ایسو سی ایشن آف انڈیا نے راجستھان، گجرات، مدھیہ پردیش اور گوا کے ساتھ ساتھ بہار میں بھی فلم ریلیز نہیں کرنے کا فیصلہ کیا ہے۔

فلم ’پدماوت‘ کے خلاف گجرات میں آج بھی کئی جگہ پرتشدد مظاہرے ہوئے۔ امریلی-راجولا-پیپاواو اسٹیٹ ہائیوے کو مقامی لوگوں نے پوری طرح بلاک کر دیا ہے۔ ایک طرف تو کئی تھیٹر مالکان نے فلم ریلیز نہ کرنے کا فیصلہ کیا ہے تو کئی سنیما گھروں میں فلم ریلیز ہو گئی ہے۔ جن سنیما ہالوں میں فلم دکھائی جا رہی ہے وہاں سیکورٹی کے سخت انتظامات کیے گئے ہیں۔

منوراج ایس. نام کے ٹوئٹر ہینڈل سے ہندوستان کا ایک نقشہ پوسٹ کیا گیا ہے جس میں پدماوت فلم کے تعلق سے ہو رہے تشدد سے متاثر ریاستوں کی نشاندہی کی گئی ہے اور ظاہر کیا گیا ہے کہ ان ریاستوں میں بی جے پی کی حکومتیں ہیں جو کرنی سینا کے غنڈوں پر قابو پانے میں ناکام ہیں۔ اس نقشہ میں جموں و کشمیر، مدھیہ پردیش، راجستھان، گجرات، بہار، مہاراشٹر، ہریانہ، اترپردیش اور چھتیس گڑھ کی نشاندہی کی گئی ہے اور ان ریاستوں میں کہاں تشدد کا واقعہ پیش آیا ہے اس کا بھی تذکرہ ہے۔

فلم 'پدماوت' کی ریلیز پر لا اینڈ آرڈر درست رکھنے سے متعلق سپریم کورٹ کے احکامات پرعمل نہیں ہونے کو لے کر توہین عدالت کی درخواستیں دائر کی گئی ہیں جن پر پیر کو سماعت ہوگی۔

سماجی کارکن تحسین پوناوالا اور ایک دیگردرخواست گزار نے دو الگ الگ درخواستیں دائر کرکے چار ریاستی سركاروں- راجستھان، ہریانہ، گجرات اور مہاراشٹر اور کرنی سینا کے عہدیداروں کے خلاف توہین عدالت کا مقدمہ شروع کرنے کی عدالت سے درخواست کی ہے۔

اتر پردیش میں پدماوت کی مخالفت زوروں پر ہے۔ وارانسی میں سنیما ہال کے باہر ایک نوجوان نے خودکشی کی کوشش بھی کی جس کے بعد پولس نے اسے حراست میں لے لیا ہے۔ دوسری طرف لکھنؤ کے ناولٹی سنیما ہال کے باہر کرنی سینا کے اراکین نے فلم پدماوت کے خلاف احتجاجی مظاہرہ کیا۔ مظاہرین نے لوگوں کو گلاب کا پھول دے کر فلم نہ دیکھنے کی اپیل کی۔ ایک احتجاجی نے یہاں تک کہا کہ ”اگر کسی نے پہلے سے ٹکٹ خرید لیا ہے تو ہم اس کے نقصان کی تلافی بھی کریں گے۔“

اتراکھنڈ کے رشی کیش میں شرپسندوں اور پولس کے درمیان جھڑپ ہونے کی اطلاع ہے۔

پدماوت تنازعہ پر اروند کجریوال نے کہا ’’کل کچھ لوگوں نے گڑگاؤں میں بچوں کی بس پر پتھر پھینکے۔ مجھے ساری رات نیند نہیں آئی۔ یہ پورے ملک کے لئے شرم کی بات ہے۔‘‘

گروگرام میں کل اسکول بس پر پتھر بازی کے الزام میں 18 لوگوں کو گرفتار کیا گیا ہے۔

واضح رہے کہ گزشتہ روز پدماوت کی مخالفت میں شرپسندوں نے جی ڈی گوئنکا اسکول کی ایک بس پر حملہ کر دیا تھا۔

کاروباری ذرائع کے مطابق کرنی سیناکے احتجاج اور دھمکی کے پیش نظر سنیماگھروں میں سخت سیکورٹی کے درمیان مختلف مقامات پر فلم ریلیز کی گئی اور فلم دیکھنے پہنچے ناظرین کی اچھی خاصی تعداد رہی۔

پدماوت فلم ریلیز ہونے کے بعد جاری پر تشدد واقعات کے پیش نظر اتراکھنڈ کی راجدھانی دہرادون میں حفاظت کے سخت انتظامات کئے گئے ہیں۔ دہرادون کے ایس پی سٹی پردیپ رائے کا کہنا ہے کہ ’’سبھی مشتبہ گاڑیوں اور افراد کی تلاشی لی جا رہی ہے۔ فلم کے تمام شو کل سے ہی ہاؤس فل ہیں۔ ہم ہر صورت حال سے نمٹنے کے لئے تیار ہیں اور ضرورت پڑی تو گرفتاری بھی عمل میں لائی جائے گی۔‘‘

چھتریہ مہاسبھا کے صدر کا اعلان ’’جو شخص دیپیکا پادوکون کی ناک اور کان کاٹ کر لائے گا اسے چھتریہ سماج کی طرف سے ایک کروڑ کا انعام دیا جائے گا۔‘‘

متنازعہ فلم پدماوت کے سلسلے میں ملک بھر میں ہونے والے احتجاجی مظاہروں پر کانگریس نے بی جے پی کی مرکز اور ریاستی حکومتوں کو بگڑتی صورت حال کے لئے ذمہ دار ٹھہراتے ہوئے کہا کہ تشدد پھیلانے والوں کے خلاف سخت کارروائی کی جانی چاہئے۔

کانگریس کی ترجمان پرینکا چترویدی نے یہاں پارٹی ہیڈ کوارٹر میں نامہ نگاروں سے بات چیت کرتے ہوئے الزام لگایا کہ حکومت نے فلم پدماوت کو ریلیز کرنے کے سلسلے میں خاطر خواہ تیاری نہیں کی جس کی وجہ سے ملک بھر میں خاص طور پر بی جے پی حکومت والی ریاستوں میں نظم و نسق کی صور ت حال خراب ہورہی ہے۔

انہوں نے کہا کہ اطلاعات و نشریات کی وزیر اسمرتی ایرانی کو فلم ریلیز ہونے سے پہلے متعلقہ فریقین کے ساتھ بات چیت کرنی چاہئے تھی۔ انہیں ایسا نظم و نسق کرنا چاہئے تھا جسے تمام فریقین قبول کرتے۔ انہوں نے کہا کہ مرکزی وزیر داخلہ راج ناتھ سنگھ کو بھی قانون و انتظام کی صورت حال کو سدھارنے کے لئے فوری قدم اٹھانے چاہئے اور تشدد میں ملوث لوگوں کے خلاف سخت کارروائی کرنی چاہئے۔

ہریانہ کے ڈی جی پی بی ایس سندھو نے دعویٰ کیا ہے کہ فلم پدماوت ہریانہ کے 9 اضلاع کے 33 سنیما گھروں میں چل رہی ہے اور اس دوران کہیں سے بھی کوئی نا خوش گوار واقعہ سامنے نہیں آیا۔ انہوں نے کہا کہ ریاست میں فلم کی نمائش پر کوئی روک نہیں ہے۔

وہیں گڑگاؤں پولس نے کرنی سینا کے جنرل سکریٹری اور سابق بی جے پی رہنما سورج پال امو کو گرفتار کر لیا ہے۔ راجپوت رہنما امو نے ابھی تک اس معاملہ میں جارحانہ رویہ کا مظاہرہ کیا ہے۔