پہلے باشندگان ملک کو ضروری ادویات کی فراہمی ہو: راہل گاندھی

نئی دہلی: امریکی صدر ڈونالڈ ٹرمپ کی کورونا کے علاج میں استعمال ہونے والی ادویات ہائڈراکسی کیلوروکوین کی ہندوستان سے سپلائی نہ ہونے پر جوابی کارراوائی کی دھمکی کے درمیان کانگریس کے سابق صدر راہل گاندھی نے کہا ہے کہ حکومت کو کسی کے دباؤ میں آئے بغیر پہلے اپنے شہریوں کو زندگی بخش ادویات دستیاب کرانی چاہیے۔

راہل گاندھی نے منگل کے روز کہا کہ سب سے پہلے ہمارے شہریوں کی ضرورت پوری ہونی چاہیے اور ان کو مناسب مقدار میں ضروری ادویات ملنی چاہیے اس کے بعد ہی ضرورت مند ملکوں کی مدد کی جانی چاہیے۔ انہوں نے ٹوئٹ کیا، ”دوستی میں بدلہ نہیں ہوتا، ہندوستان کو بحران کے وقت تمام ضرورت مند ممالک کی مدد کرنی چاہیے لیکن پہلے ہموطنوں کے لئے کافی مقدار میں زندگی بخش ادویات دستیاب ہونی چاہیے“۔

واضح رہے کہ صدر ٹرمپ نے اشارہ دیا ہے کہ اگر ہندوستان نے ہائڈراکسی کیلوروکوین ادویات کی برآمدات پر سے پابندی نہیں ہٹائی تو وہ جوابی کارروائی کر سکتے ہیں۔ اس دوا کا استعمال کورونا وائرس سے متاثر مریضوں کے علاج میں کیا جا رہا ہے جسے دیکھتے ہوئے ڈونالڈ ٹرمپ نے وزیر اعظم نریندر مودی سے اس دوا کی فراہمی کے لئے اپیل کی تھی۔