یوپی اسمبلی: نظم و نسق کی بدحالی پر کانگریس سراپا احتجاج، ڈاکٹر کفیل کے حق میں لہرائے پوسٹر

لکھنؤ: کورونا وائرس کی عالمی وبا کے دور میں ہفتہ کے روز اتر پردیش قانون ساز کونسل کی کارروائی کا آغاز ہوا۔ اجلاس کے دوران حزب اختلاف نے صوبہ کی ناقص نظم و نسق کی صورت حال اور دیگر امور کے حوالہ سے احتجاجی مظاہرہ کیا۔ شور و غل اور ہنگامہ کے دوران ہی حزب اقتدار نے اپنی بات رکھنے کی کوشش کی۔

اتر پردیش اسمبلی کے احاطہ میں کانگریس کے لیڈارن نے زوردار احتجاج کیا۔ کانگریس کے صوبائی صدر اجے کمار للو دیگر کانگریس اراکین اسمبلی کے ساتھ احاطہ میں واقعہ چودھری چرن سنگھ کے مجسمہ کے پاس دھرنے پر بیٹھے۔ احتجاج میں یوپی قانون ساز کونسل میں قائد حزب اختلاف ارادھنا مشرا اور ایم ایل سی دیپک سنگھ بھی شامل رہے۔

تمام اراکین اسمبلی نے ہاتھوں میں پلے کارڈز اٹھا کر یوگی حکومت کے خلاف نعرے لگائے۔ تختیوں پر ’’قانون وئے وستھا دھوست ہے، یوگی بابا مست ہے‘ ، ’یوریا کی کالا بازاری بند کرو' ، 'گنے کی قیمت ادا کرو' ، 'بنکروں کو پیکیج دو' ، 'نوجوانوں کو روزگار دو ' جیسے نعرے لکھے ہوئے تھے۔

پوپی کانگریس کے صدر اجے کمار للو نے ایک پلے کارڈ ایسا بھی اٹھایا ہوا تھا جس پر ڈاکٹر کفیل کو رہا کرنے کا مطالبہ لکھا تھا۔ واضح رہے کہ ڈاکٹر کفیل کئی مہینے سے متھرا جیل میں بند اور ان پر یوگی حکومت نے این ایس اے (قومی سلامتی قانون) کے تحت کارروائی کی تھی۔

اس موقع پر اجے کمار للو نے کہا ’’کانگریس کی قیادت والی یو پی اے حکومت میں کسانوں کا مفاد اولین ترجیح تھا۔ بی جے پی حکومت کا کسان مخالف چہرہ اب کھل کر سامنے آ گیا ہے۔ کسانوں کے مفاد کے لئے کانگریس سڑک سے لے کر ایوان تک جد و جہد کرنے کے لئے پُر عزم ہے۔‘‘