آئی آئی ٹی دہلی کی تیار کردہ انتہائی کفایتی کورونا جانچ کٹ لانچ

نئی دہلی: فروغ انسانی وسائل کے مرکزی وزیر ڈاکٹر رمیش پوکھریال نشنک نے کورونا سے لڑنے کے لیے محض 399 روپے کی انتہائی کفایتی جانچ کٹ بدھ کے روز لانچ کی جو انڈین انسٹی ٹیوٹ آف ٹیکنالوجی (آئی آئی ٹی) دہلی نے تیار کی ہے۔ اس کٹ کے ذریعہ 30 لاکھ لوگوں کی جانچ کی جاسکتی ہے۔

ڈاکٹر نشنک نے ویڈیو کانفرنسنگ کے ذریعہ اس کٹ کو لانچ کرتے ہوئے کہا کہ آئی آئی ٹی دہلی نے کورونا بحران کے مشکل وقت میں بہت ہی کم دنوں میں یہ کٹ تیار کرکے ایک تاریخی کام کیا ہے اور اس سے دنیا میں ہندوستان کا سر فخر سے بلند ہوا ہے۔

انھوں نے آئی آئی ٹی دہلی کے ڈائریکٹر راج گوپال راؤ اور ان کی ٹیم کو اس کٹ کے لیے مبارک باد دیتے ہوئے کہا کہ انھوں نے بہت کم وقت میں یہ کٹ تیار کی ہے جو محض 399 روپئے کی ہے جبکہ باہر یہ کٹ 2000 روپئے میں ملتی ہے۔ اس کٹ کے ذریعہ صرف تین گھنٹہ میں جانچ رپورٹ ملے گی جبکہ دیگر کٹ سے کم سے کم 24 گھنٹے میں رپورٹ ملتی ہے۔ پہلے کٹ سے صرف تین لاکھ جانچ ہوپاتی تھی جبکہ اس کٹ سے 20 لاکھ مریضوں کی جانچ ہوسکے گی۔

ڈاکٹر نشنک نے کہا کہ آج ہم 128ملکوں کے ساتھ تحقیقی کام میں مصروف ہیں اور ہمارے آئی آئی ٹی نے اپنی تحقیق اور ریسرچ سے ملک کا نام پوری دنیا میں روشن کیا ہے۔ گوگل کے سی ای او بھی آئی آئی ٹی کے طالب علم رہے ہیں۔ انھوں نے کہا کہ آج ہم ریسرچ وتحقیق میں دنیا کی قیادت کرنے جا رہے ہیں اور ہمارے پاس صلاحیت بھی ہے، مشن بھی ہے اور ویژن بھی ہے، صرف کمی ہے تو تال میل کی۔ اب ہماری صلاحیتوں کو بیرون ملک جانے کی ضرورت نہیں۔

ڈاکٹر نشنک نے کہا کہ انھیں اس بات کی خوشی ہے کہ آئی آئی ٹی دہلی نے آج کے دن یہ کٹ لانچ کی ہے اور آج ان کی سالگرہ ہے بھی ہے۔ انھوں نے کہا کہ ’’ ہم نے اپنی زندگی میں کبھی سالگرہ نہیں منائی لیکن جب اتراکھنڈ کا وزیراعلی تھا تو ہم نے اپنی سالگرہ پر خون کے عطیہ کے لیے ایک اسکیم شروع کی کیونکہ خون کی ایک بوند لوگوں کی زندگی بچا سکتی ہے۔ میں آج اپنی سالگرہ کے موقع پر آئی آئی ٹی دہلی ہی نہیں بلکہ فروغ انسانی وسائل کی وزارت سے اپیل کرتا ہوں کہ کم سے کم ہر تین ماہ میں ایک دن سمویدنا پروگرام منعقد کرکے خون کے عطیہ کے لیے کیمپ لگائے جائیں، جس سے لوگوں کی زندگی بچانے میں ہم اپنا تعاون دے سکیں۔‘‘