اہم خبریں: مہاراشٹر میں 104 آئی پی ایس افسران کا تبادلہ، کئی پولیس افسران کا ممبئی سے باہر ٹرانسفر

مہاراشٹر حکومت کے محکمہ داخلہ نے ریاست میں 104 آئی پی ایس افسران کا تبادلہ کر دیا ہے۔ اس کے تحت ریاست میں کئی پولیس سپرنٹنڈنٹ (ایس پی) اور پولیس ڈپٹی کمشنر (ڈی سی پی) کے تبادلے کا حکم جاری کیا گیا ہے۔ اس میں کئی پولیس افسران کو ممبئی سے باہر بھیجا گیا ہے۔

ہماچل پردیش واقع اونا کے ہرولی اسمبلی حلقہ مین ایک جلسہ عام سے خطاب کرتے ہوئے کانگریس لیڈر پرینکا گاندھی نے کہا کہ ’’یہاں کے نوجوان پریشان ہو گئے ہیں۔ وہ ملازمت چاہتے ہیں، لیکن ان کو ڈرگس مل رہا ہے۔ یہاں نشہ پھیلایا جا رہا ہے لیکن روزگار نہیں دیا جا رہا۔ ہیاں نوجوانوں کی 30 لاکھ آبادی ہے اور 15 لاکھ افراد بے روزگار ہیں۔‘‘

گجرات ہائی کورٹ نے موربی پل حادثے کا ازخود نوٹس لیا ہے۔ محکمہ داخلہ، شہری مکانات، موربی میونسپلٹی، ریاستی انسانی حقوق کمیشن سمیت ریاستی حکومت کے عہدیداروں کو نوٹس جاری کئے ہیں۔ عدالت نے ریاست سے ایک ہفتہ کے اندر پورے واقعہ کی رپورٹ طلب کی ہے۔ اب اگلی سماعت 14 نومبر کو ہوگی۔

سپریم کورٹ نے سرکاری ملازمتوں میں اقتصادی طور پر کمزور طبقے (ای ڈبلیو ایس) کو دیئے گئے ریزرویشن کو منظوری دے دی ہے۔ چیف جسٹس یو یو للت کی 5 رکنی بنچ میں سے تین ججوں نے آئین میں 103ویں ترمیم کو برقرار رکھا۔

دہلی-این سی آر کی ہواؤں میں مسلسل دوسرے دن معمولی بہتری آئی ہے۔ جیسے ہی بہتری آئی، مرکزی حکومت کی فضائی معیار کی ایجنسی سی اے قیو ایم نے گریڈڈ رسپانس ایکشن پلان (گریپ) کے چوتھے مرحلے سے دستبرداری کا اعلان کر دیا۔ ریاستی حکومت دہلی میں پرائمری اسکول کھولنے اور دفاتر میں دوبارہ 100 فیصدی حاضری کو نافذ کرنے کے بارے میں آج فیصلہ لے سکتی ہے۔