اہم خبریں LIVE: اداکار آدتیہ سنگھ راجپوت اپنے اپارٹمنٹ میں مردہ پائے گئے، پولیس تحقیقات شروع

ممبئی پولیس کے مطابق اداکار آدتیہ سنگھ راجپوت اندھیری علاقہ واقع اپنے اپارٹمنٹ میں مردہ پائے گئے۔ لاش کو پوسٹ مارٹم کے لیے بھیج دیا گیا ہے اور پولیس تحقیقات شروع ہو گئی ہے۔

بہار کے وزیر اعلیٰ نتیش کمار نے آج راجدھانی دہلی میں کانگریس صدر ملکارجن کھڑگے اور کانگریس کے سابق صدر راہل گاندھی سے ملاقات کی۔ اس ملاقات کو لوک سبھا انتخاب 2024 کے پیش نظر انتہائی اہم تصور کیا جا رہا ہے کیونکہ اپوزیشن پارٹیوں کے اتحاد کی کوششیں تیز ہو چکی ہیں۔ کرناٹک میں کانگریس کی زبردست کامیابی کے بعد یکساں نظریہ کی حزب مخالف پارٹیوں میں اتحاد کو لے کر سرگرمیاں بڑھ گئی ہیں۔

حوالہ اور منی لانڈرنگ معاملے میں دہلی کی تہاڑ جیل میں بند عآپ حکومت کے سابق وزیر ستیندر جین کی طبیعت اچانک بگڑ گئی ہے۔ عآپ لیڈر کی طبیعت بگڑنے کی شکایت کے بعد انھیں فوری طور پر صفدر جنگ اسپتال لے جایا گیا ہے۔

بجرنگ پونیا نے کہا کہ میں نارکو ٹیسٹ کے لیے تیار ہوں۔ یہ ٹیسٹ سپریم کورٹ کی نگرانی میں کرایا جائے۔ اس کے ساتھ ہیڈ کوچ کا بھی ٹیسٹ ہونا چاہیے۔

اروناچل پردیش کے بعد آسام میں بھی زلزلے کے جھٹکے محسوس ہوئے ہیں۔ میانمار کے ساتھ اروناچل پردیش میں صبح 8.15 پر زلزلہ آیا اور تقریباً آدھے گھنٹے بعد آسام میں بھی زلزلہ آیا۔ آسام کے تیز پور میں 3.2 شدت کا زلزلہ آیا۔ جبکہ اروناچل پردیش میں 4.5 کی شدت کا زلزلہ آیا۔