لالو پرساد خرابیٔ صحت کے باوجود بیٹی روہنی کے لیے چلائیں گے انتخابی مہم، چھپرہ میں کریں گے کیمپ

آر جے ڈی چیف لالو پرساد یادو خرابیٔ صحت کی وجہ سے اب تک انتخابی تشہیر میں حصہ لیتے ہوئے دکھائی نہیں دیے ہیں۔ لیکن جلد ہی انھیں این ڈی اے اتحاد کے خلاف مہم چلاتے ہوئے دیکھا جائے گا۔ دراصل وہ اپنی بیٹی اور سارن لوک سبھا حلقہ سے انڈیا اتحاد کی امیدوار روہنی آچاریہ کے لیے انتخابی تشہیر کرنے والے ہیں اور اس کے لیے وہ آج پٹنہ سے چھپرہ کے لیے روانہ بھی ہو گئے ہیں۔ اب الیکشن تک وہ چھپرہ میں ہی کیمپ کریں گے تاکہ روہنی آچاریہ کی جیت کو یقینی بنا سکیں۔

میڈیا رپورٹس کے مطابق لالو پرساد اپنی شریک حیات رابڑی دیوی کے ساتھ بدھ کے روز پٹنہ سے چھپرہ کے لیے روانہ ہوئے۔ آر جے ڈی لیڈران کا کہنا ہے کہ لالو پرساد آر جے ڈی امیدوار روہنی آچاریہ کی حمایت میں سارن میں روڈ شو کر سکتے ہیں۔ اس دوران وہ سارن لوک سبھا حلقہ کے گاؤں کا بھی دورہ کرنے کا ارادہ رکھتے ہیں۔ وہ چھپرہ واقع پارٹی دفتر میں کارکنان سے ملاقات بھی کریں گے اور موجودہ سیاسی حالات کو سمجھیں گے۔

واضح رہے کہ سارن میں روہنی آچاریہ کا اصل مقابلہ بی جے پی امیدوار راجیو پرتاپ روڑی سے ہے۔ لوک سبھا انتخاب کے پانچویں مرحلہ میں 20 مئی کو سارن کے ووٹرس اپنے حق رائے دہی کا استعمال کریں گے۔ آر جے ڈی امیدوار روہنی سبقت بنانے کے مقصد سے لگاتار علاقے میں عوامی رابطہ کر رہی ہیں۔ خاص بات یہ ہے کہ لالو یادو خود بھی سارن سے رکن پارلیمنٹ رہ چکے ہیں۔