تیج پرتاپ نے شروع کی جن شکتی یاترا

راشڑیہ جنتادل کے رکن اسمبلی اور بہار کے سابق وزیر صحت تیج پرتاپ یادو نے بڑھتی مہنگائی اور بے روزگاری کے خلاف ’جن شکتی یاترا شروع کی ہے ۔

آرجے ڈی سپریمو لالو پرساد کے بڑے بیٹے تیج پڑتاپ نے پٹنہ ضلع کے بہٹا سے اپنی جن شکتی یاترا کی شروعات کی اور محروم طبقات کی تکلیفوں کے تئیں اپنی حساسیت کا مظاہرہ کرنے کیلئے ایک دلت کے گھر میں کھانا کھایا۔

رکن اسمبلی نے کہاکہ مہنگائی خطرناک طریقے سے بڑھ رہی ہے جس سے عام آدمی خاص کر غریبوں کو کافی پریشانیاں ہورہی ہیں۔ انہوں نے کہاکہ موجودہ حکومت میں لوگوں کو روزگار نہ ملنے سے ان کی حالت انتہائی قابل رحم ہوگئی ہے ۔ انہوں نے کہاکہ نوکری نہیں مل پانے سے نوجوان مایوس ہیں ۔ انہوں نے الزام لگایاکہ حکومت کسانوں کو بھی مدد نہیں دے رہی ہے ۔

مسٹر یادو اپنی” جن شکتی یاترا کے دوران “ ریاست کے تمام اضلاع کا دورہ کریں گے ۔ اس دوران وہ کسان ، غریب اور مزدوروں سے بات چیت کریںگے۔ انہوں نے کہاکہ ان کی یاترا کا مقصد غریبوں ، کسانوں اور مزدوروں کے مسائل کو جاننا اور انہیں تعاون فراہم کرنے میں حکومت کی ناکامیوں کو اجاگرکرنا ہے ۔